放暑假成日都係行商場？今個夏天，不如帶埋家人走入劇場！由文化體育及旅遊局呈獻、康樂及文化事務署策劃，第三屆中華文化節以「傳奇」為題，將經典故事注入當代創意，係今個暑假一家大細最值得期待嘅盛事。限時閃購至4月30日，優惠高達七折，有心水節目要早啲行動！
開幕節目：「夢之隊」經典《白蛇》新詮釋
打頭陣嘅舞劇《白蛇》，由偶像級國際芭蕾舞星譚元元擔任藝術總監，率領內地及海外一線舞者組成「雙卡司」星光熠熠。節目糅合芭蕾舞、中國舞、現代舞同武術，仲加入心理學元素，將故事重新解讀，白娘子與許仙嘅千年傳奇轉化為探討現代女性精神世界嘅旅程，帶俾你耳目一新嘅體驗。
中國戲曲節：頂級京劇武生飆技「大晒冷」
戲曲嘅魅力，又豈止「精彩」兩個字咁簡單？今年中國戲曲節陣容鼎盛，打頭炮嘅「京劇大武生藝術展演」先聲奪人──上海、北京、天津、湖北四大京劇院嘅頂尖武生難得齊集香港，同台獻技。從悲涼激越嘅《林冲夜奔》、雄渾壯闊嘅《長坂坡、漢津口》，到機鋒鬥智嘅《三岔口》── 台台好戲，幕幕精彩。想睇文戲？江蘇省演藝集團崑劇院《南柯夢》全本上演，崑曲名家施夏明坐鎮，攜手崑劇院優秀演員深情演繹湯顯祖名著。新編粤劇《廣陵散》以魏晉名士嵇康為主角，粤劇老倌龍貫天、鄧美玲、阮兆輝、廖國森與新秀演員同台「鬥戲」，在戲曲嘅傳統梆黃與曲牌之間呈現文人風骨。仲有三個同屬梆子聲腔嘅地方劇種，激越唱腔與高難度武技兼備，同樣不容錯過！
古都洛陽 隋唐文化
洛陽除咗牡丹仲會諗起咩？今年文化節焦點城市就係古都洛陽！七月有洛陽豫劇院演出馬派經典《穆桂英掛帥》外，更有「河洛連香江」展覽，當中設以武則天為主題嘅換裝體驗。親子必睇嘅《唐古百戲》，新疆生產建設兵團雜技團帶來一場歎為觀止嘅雜技盛宴，唔少得鄭州歌舞藝術中心嘅《河洛唐舞》，舞者化身唐俑樂師翩翩起舞，十多篇舞蹈精品貫徹「讓文物活起來」嘅主題，睇完仲想睇多場！
古韻舞樂跨界交融
聽過太空音樂未？1977年美國太空總署將古琴名曲《流水》收錄於金唱片送上太空。今個夏天，國家級非遺傳承人姚公白喺「弦徽真趣」古琴音樂會中，首次公演1821年《指法匯參確解》譜書嘅版本。想要更多驚喜？本地音樂家馬瑋謙將傳統嗩吶、喉管與爵士樂碰撞出新火花，嗩吶夾爵士，friend到夾band夠晒香港味！鍾意異域風情嘅，《絲路迴響・胡樂新聲》音樂會以烏德琴、馬頭琴等樂器演繹絲路旋律，從波斯走到長安！鍾意大場面嘅話，榮獲第十八屆文華獎音樂獎嘅《樂和長歌》就啱晒您！湖北省博物館鎮館之寶曾侯乙編鐘一比一復刻搬上舞台，荊楚文化現眼前，喺香港難得一見！
免費節目
文化節仲有一系列免費延伸活動，包括將表演藝術帶入社區嘅《多彩華藝》演藝嘉年華、「香港賽馬會呈獻系列：長安萬象──陝西隋唐文明展」，以及不同類型嘅工作坊同講座，免費入場，男女老幼都啱睇！
詳情：https://www.ccf.gov.hk/tc/