淘寶騙案 | 女客服稱兒子生病借錢 20歲港男因3事深信付$2萬 追數不成揭對方為職業騙徒：好心累事

【淘寶/騙案/客服/借錢/追數/騙子/電騙】一名20多歲的男網民早前在Facebook群組「淘寶唔開心share」中發帖，表示在2023年1月新冠肺炎疫情期間，在內地網購平台「淘寶」購買氧氣機，當時跟比他年長多年的女客服交換了「微信」帳號。

然而在去年12月2日晚上約11時半，該女客服傳訊息給事主，聲稱兒子生病，問他借5,000元；翌日（3日）下午再借5,000元；同月27日早上聲稱自己同樣生病「隨時會死」，向他再借1萬元。

因3件事不疑有詐借出2萬元

事主指曾跟對方交易，且對方能出示影片和身分證明，他便不疑有詐，先後給予對方2萬元，「因為喺『淘寶』同佢買過嘢，所以放低咗戒心，本來諗住好心幫一幫，因為我覺得『淘寶』商家應該唔會咁啩，佢又影身分證畀我，一時好心咁就想上咗當，肯定唔係鹹濕，好冤枉，佢係阿姐，年紀大我好多年」。

揭女方為職業騙徒 騙取106萬港元

然而，當事主向該女子追款時，對方卻消失無蹤。他向內地警方求助，警方著他到深圳錄口供。後來憑對方身分證調查，發現她是一名「職業騙子」，早於2019年已行騙，目標估計是曾跟她交易的客人，警方查出她現時在深圳上南區居住，建議事主向深圳人民法院作詐騙或民事起訴。

「法庭檔案顯示已經有7個人起訴咗佢，被騙總金額100多萬人民幣（約106萬港元）。唉，衰弱智，好心累事，而家睇番啲訊息自己都笑，交咗學費，成件事好嘔心，嗰晚啱啱收工返到屋企準備瞓覺，人又攰，迷迷糊糊咁就上咗當，成日以為好似電視劇咁幫人會有好報」。

網民：咁熱心做咩

惟帖文曝光後，不少網民都不同情事主的遭遇，「你咁熱心做咩呢」、「講真，唔好話人哋食你愛心，素未謀面都可以借錢畀人」、「連假病歷都冇，求其上網搵啲Q&A截個圖就係病，咁都借錢」、「其實你又唔識佢，佢嘅事關你咩事啫」、「你好人到我都想加你微信，我唔會笑你，我明白呢個世界上真係有人會心軟又咁好心。交咗呢2萬嘅學費之後，你真係要認認真真上呢一課。好人都要有戒心，好人嘅心入面都需要一把尺。都希望呢2萬對你嚟講只係微不足道嘅碎銀」、「難怪咁多人做騙子，香港人的錢實在太容易呃了！」。

【延伸閱讀】

騙案注意 | 深水埗現疑似騙錢黨 內地女稱銀行卡凍結借$100返羅湖 港女一句話揭破對方仍死撐

網上平到笑「商務客位唔使二千蚊」 苦主誤墮騙局「並沒類似優惠」

「寶藥黨」騙案再現香港令婆婆慘遭損失 十幾蚊藥材變八千銀蟲草咁都得?