【家事常識/揀燈膽/家居照明/裝修貼士】揀燈膽，有人愛用黃燈、有人愛白燈，但原來燈光顏色點揀，並唔係個人喜好咁簡單，裝修平台「裝修佬」裝修學院院長Simon Tang原來家中不同空間，如客廳、睡房、廚房、浴室需要以不同燈光配搭來提供居住舒適感。即入內文睇下黃燈、白燈的用途、家中不同空間需要使用甚麼燈膽。
甚麼是燈膽色溫？
燈光顏色其實係用「色溫」（Color Temperature）嚟量度，單位係K。簡單嚟講：
- K數越低 → 光線越偏黃（暖色調）
- K數越高 → 光線越偏白甚至偏藍（冷色調）
一般家居常用色溫範圍由2700K至5000K不等，唔同色溫會直接影響空間氛圍同人嘅情緒。
燈膽色溫的功能
唔同色溫嘅燈光有唔同功能，揀啱色溫可以令生活更舒適：
- 燈泡色溫2000K：氣氛光，呈黃偏橘、亮度較低，營造舒適氛圍。
- 燈泡色溫3000K：黃光，適合日常房間或走廊等使用。
- 燈泡色溫4000K：自然光，最符合人眼視覺生理需要，讓人在清醒中又有着溫暖的感覺。
- 燈泡色溫5700K-6500K：白光，適合需要專注力嘅地方。
家中不同空間點揀燈膽？
客廳：白光（5000K）＋黃光（3000K）
客廳就適合用白光，令人精力集中，又能保持成個空間嘅通透，同時可搭配黃色落地燈、枱燈去營造溫馨感。
【買燈膽貼士】客廳通常係家中面積較大的空間，所以可以選擇配搭多盞燈飾來照明。
廚房：白光（4000K–5000K）
廚房係需要清楚睇到食材同操作細節嘅地方，建議選擇4000K至5000K嘅色溫。冷白光可以讓空間污垢一眼睇清，同時令使用者保持集中力，同時能夠真實呈現食材顏色，令煮食時查看熟度更容易。
睡房：黃光（3000K）
睡房係最需要放鬆嘅地方，建議選擇2700K至3000K嘅暖黃光。柔和嘅黃光可以幫助身體放鬆，相反白燈色溫過高會影響睡眠，黃燈反而有助提升睡眠質素。
洗手間：黃光（3000K）
洗手間亦係需要放鬆的地方，Simon亦建議選擇3000K至4000K嘅黃光至自然光燈飾，呢個色溫範圍夠明亮之餘，又唔會令膚色顯得過於蒼白或過黃。
書房/工作間：自然光 4000K–5000K
書房係需要長時間閱讀或使用電腦嘅地方，建議選擇4000K至5000K嘅自然白光。呢個色溫可以提升專注力，令文字更清晰，減少眼睛疲勞。同樣的燈光亦可使用在家中走廊。
【買燈膽貼士】這個色溫的燈可以安裝在槽之內，減少燈光直射，眼睛最舒適。
【延伸閱讀】
潮濕天氣 | 濕度高家居5大發霉黑點 3招天然除霉清潔 8件平價法寶吸濕防潮橙皮咖啡渣都有用
抽濕機 | 3大最佳擺放位置 濾網/水箱清潔法 年慳8%電延使用壽命 抽出水分忌重用抹地