【家事常識/衣物去污/衣物清洗】外出食飯，衣服不小心濺到醬油、滴到果汁或沾到果醬，不少人下意識會用紙巾來回擦拭，但這個動作其實是大忌，隨時令污跡越擴越大、越難清理。台灣洗衣達人沈富育教授3分鐘去污黃金法則，教你即場用啱方法急救，輕鬆救回心愛衣物，他亦會分享衣物上不同污跡要用那種清潔劑處理。
一個動作做錯，污跡永久滲入衣物！
最常見嘅錯誤，就係用紙巾或濕布 「來回擦拭」 污跡。這個動作會將污跡嘅色素同油脂強行壓入布料纖維深處，同時將污跡範圍推開，令污跡「擴大兼入骨」，返到屋企仲難洗得甩。所以，記住口訣第一步：千祈唔好擦！
3分鐘衣物去污急救法
1. 「吸」— 適用於：打翻飲料（果汁、茶、酒類）
當飲品滴到衣服上，要即刻用廚房紙或乾布 「定點輕輕拍打」，吸走表面嘅液體。如果情況許可，最好除低件衫，喺污跡嘅背面墊一塊布或紙巾，再喺正面輕拍，咁就可以防止污跡滲透擴散，唔會擴大「污染」範圍。
2. 「沖」— 適用於：醬油、醋等深色液體
呢類深色醬汁要盡快 「先用水沖」，由污跡背面用凍水沖，將濃縮嘅色素稀釋，減少滲入衣物纖維。要留意，如果衣物係羊毛或真絲等唔適宜濕水嘅布料，就唔好直接沖水，改為用濕紙巾或沾濕嘅布輕按吸拭。
3. 「拍」— 適用於：濺到油脂（食油、汁液）
當被食油或汁液濺到，同樣要用濕布或濕紙巾定點輕輕拍打，而唔係來回抹。來回擦拭會將油污推開，令範圍變大；拍打則可以將油污「吸」返出嚟，減少滲透。
4. 「抓」— 適用於：菜渣、固體污跡
當有肉碎、餸菜渣等固體跌到衣服上，要即刻用紙巾 「輕力抓走」 固體殘渣，避免佢哋進一步壓入布料造成二次污染。記住力度要輕柔，同埋從污跡中段入手，以免將殘渣整碎，增加清理難度。
5. 「刮」— 適用於：果醬、奶油、厚重肉醬
面對杰身嘅醬料，首先要做嘅係用匙羹、卡片（如八達通） 等工具，將表面嘅主污跡「刮」走。呢個動作要小心，避免刮到污跡周圍嘅乾淨位置，可以用另一隻手護住旁邊，防止二次污染。
污衣後續處理小貼士
完成以上即場急救後，污跡已經被大大稀釋或移除。返到屋企盡快清洗，可以用稀釋嘅漂白水（適用於白色衫）或洗衣液處理。謹記：用凍水清洗污跡，因為熱水有機會令蛋白質類污跡（如血漬、奶漬）凝固，仲難洗得甩。
不同衣物污跡正確清潔方法
| 汙染源類型 | 急救口訣 | 處理原則與要點 |
|---|---|---|
| 果汁、茶、酒等液體飲料 | 「吸」 | 用廚房紙巾或乾布吸拭多餘殘汁。可脫下衣物時，在汙漬背面墊布，防止汙染範圍擴大。 |
| 醬油、醋等深色液體 | 「沖」 | 盡快用水沖洗稀釋顏色，減少滲入纖維。（註：毛料、蠶絲等材質不宜碰水，應改用濕紙巾吸擦） |
| 油脂（食用油等） | 「拍」 | 用沾濕的布或紙巾，在油汙處輕輕拍打。嚴禁來回擦拭，以免擴大汙染。 |
| 肉醬、食物菜渣等塊狀物 | 「抓」 | 立刻用紙巾輕柔地抓取固體殘渣，力道要輕，避免抓碎殘渣造成二次汙染。 |
| 果醬、奶油、厚重肉醬等黏稠汙漬 | 「刮」 | 用湯匙或卡片（如八達通） 先刮除表面主要的黏稠汙漬，動作要小心，避免碰觸周圍乾淨區域。 |
【延伸閱讀】
家事常識｜梳打粉10大隱藏用法：防腳臭護胃通渠 除臭去油漬洗衣都得！即學正確方法
家事常識｜快乾衫越洗越臭？原來係錯用呢2款洗衣產品 專家教你正確洗快乾運動衫除噏味