一向甚少有放盤嘅南丫島，係唔少人周末度假嘅勝地，有部份人更加希望喺度置業，直接喺度住日日度假Feel。最近南丫島榕樹灣出現一個拍賣盤，建築面積350，內裝企理，拍賣開價只係138萬，值得睇睇！
今次拍賣物業來自忠誠集團於12月17日嘅拍賣單位，位於南丫島榕樹灣大坪106號地下1號單位。單位嘅間隔方正，同好多村屋一樣，門前有一塊小空地，用來曬衫、BBQ等乜都等，穿過空地就可以進入客廳。
據拍賣行嘅相片睇到，客廳以水泥地、白色牆作為設計主調，加上現時使用嘅木系傢俬，令室內環境充滿度假風。不過，單位由於建築面積只有350平方呎，所以室內空間唔多，可以話一眼睇晒，經過玻璃門左邊就係飯廳，右邊係開放式廚房；再走入幾步，左邊深處係梳化及睡眠區，而右邊就係浴室，拉開浴室嘅「巴士門」，就會見到浴室採用企缸設計。
整體而言，據相片環境認為單位嘅狀態良好，天花牆身無石屎剝落，只係有少量使用痕跡。單位喺今次嘅拍賣開價138萬，開價比同區以往類近物業嘅成交價，大概有6折左右。
📍 物業地點：南丫島榕樹灣大坪106號 地下1號單位
🏘️ 物業面積：350平方呎（建築面積）
📏 平均呎價：$3,943港元 （建築面積）
💰 拍賣開價：138萬港元
📅 拍賣日期：12月17日（星期三）下午3時
✍🏻 物業編號：25121703
🔑 拍賣地點：中環德輔道中84-86號章記大廈３樓Ａ室
延伸閱讀
大埔宏福苑五級火｜按揭專家指火險賠償足抵按揭欠款 未供完樓災民應無須繼續供樓