踏入2026年，香港樓市承接2025嘅頹勢，繼續出現唔少銀主盤。好似今日嘅主角、一個嘉湖山莊麗湖居大單位，本身業主理應完成供款，最後輪為銀主盤，究竟咩事呢？
今次主角，係原於物業拍賣行忠誠集團於1月8日嘅拍賣物業。單位位於嘉湖山莊麗湖居10座一個中層A室單位，原業主於2004年以143萬購入單位，屬於單位嘅第三任業主。而第二任業主更好好彩，因為佢從一首業主手上，以蝕讓5成2嘅價錢（即129萬），於2004年購入，再摸貨兩個月後賣俾今次嘅業主，微賺14萬。
而今次嘅業主持貨21年，理應已經完成按揭供款，相信業主事後以樓契加按，但又未能還款導致變成銀主盤。依家拍賣行嘅叫價係390萬，如果能夠直接呢口價接貨，到底抵唔抵買？就同大家睇睇兩個數據，以匯豐銀行嘅網上估價計算（2025年12月31日），單位嘅估值係550萬，比拍賣價高出160萬；另一個參考數據係同一柱嘅28樓A室，於2025年3月成交，當時嘅成交價為515萬，同拍賣單位都有125萬嘅差距，所以如果能夠以拍賣第一口叫價入手，其實都唔錯。
呢個單位嘅實用面積635平方尺，屬於三房套廁設計，單位佈局非常好用，唔單只有梗廚，入門口嘅左右區域可以明確地分隔出客廳區及飯廳區。主人房嘅浴室設有浴缸，而客廁則設有企缸。據拍賣行提供嘅相片睇到，單位雖然保留住當年一首買入時嘅裝修，充滿住大量嘅使用痕跡，不過都無明顯嘅結構老化問題，相信新買家只需要進行一次全屋油漆翻新，集中資源翻新廚廁就可以使用。
嘉湖山莊麗湖居物業 拍賣開價390萬
📍 物業地點：天水圍天葵路3號嘉湖山莊麗湖居(第10座)22字樓A單位
🏘️ 物業面積：635平方呎
📏 平均呎價：約6,141.7港元
💰 拍賣開價：390萬港元
📅 拍賣日期：1月8日（星期四）下午3時
✍🏻 物業編號：26010802
🔑 拍賣地點：中環德輔道中84-86號章記大廈３樓Ａ室
延伸閱讀
香港樓市｜居屋2025明年第二季推8316伙 市價七折發售 即睇六大屋苑位置/樓價/實用面積/關鍵日