拍賣樓｜俄烏戰事級摧殘廢墟單位土瓜灣譚公道 290萬銀主盤

喺物業投資世界，向來都有一班人喜愛入手高齡物業，博一博遇上市區重建計劃，就可以高價被收購獲利，今次嘅主角都一樣，只係結局不一樣，博輸咗淪為銀主盤，單位係位於土瓜灣譚公道142號一幢戰後樓宇，於1955年落成，足足71年歷史。

今次淪為銀主盤嘅單位，來自忠誠集團於2月4日拍賣嘅項目之一。據地產代理網上資料顯示，位於譚公道142號嘅樓宇落成於1955年，而拍賣嘅單位上手業主於2019年8月升市期間，斥資150萬元入手。據有關人士透露，由於物業鄰近啟德體育園，原業主打算購入單位後待市區重建計劃展開，就可以高價賣出圖利，所以購入後單位都無進行過任何裝修、出租等。可惜遇上疫情及樓市下滑，令市區重建計劃放緩，等不到收購重建便資金不足，斷供淪為銀主盤。

講番今次拍賣物業資料，單位嘅實用面積達589平方呎，空間大。不過由於多年無修葺，所以牆身、天花、地板爛嘅程度達戰爭廢墟級數，最誇張係廚房牆身爛到似有粉碎嘅危機。而今次嘅拍賣開價都唔平，起始價要290萬，即平均呎價要HK$4,924呎。到底啟德體育園隨後嘅周邊發展，幾時可以惠及附近嘅舊樓群，就要拭目以待。