唐樓，唔一定係殘裝修；銀主盤嘅唐樓，更唔一定係爛到似廢墟，原來都有好嘢。今次主角係一個位於大坑嘅5層高舊樓銀主盤，全屋裝修企理，簡直係可以即買即住級別，值得一睇！
銀主盤：大坑浣紗街11號
據物業代理網址資料顯示，今次主角「大坑浣紗街11號」係1960年2月入伙，足足66年樓齡。其實位置條件非常好，位於浣紗街最旺嘅一段，旁邊係龍濤苑，對面有唔少食肆、Cafe及大排檔。由大廈步行至天后港鐵站大約8分鐘，相同步程反方向都可以去到銅鑼灣怡和街，可以話係靜中帶旺。
至於今次嘅主角，單位位於5樓頂層連天台，室內空間約638平方尺，附帶一個411平方尺嘅天台。大家咪睇佢有60年樓齡，相信前業主曾經為單位進行全面翻新，所以會見到客廳、睡房、廁所嘅牆身及地磚都非常企理，仲備有格調十足嘅燈飾，只係單位嘅冷氣機比較舊，新買家可能要換一換先可以入住。同時，廚房位於客廳嘅另一邊盡頭，入面仲有一個小露台，望向山邊，閒時喺度飲杯咖啡都唔錯。
不過，今次嘅銀主盤起始價都唔平，叫價為450萬港元，平均呎價都要$7,053呎。參考同一條街嘅數據，發現呢類舊樓近3年都無新成交，而其他相對新少少嘅物業，成交呎價大約$14,000左右，大家可以參考一下。而今次嘅銀主盤，將會喺4月15號進行拍賣。
大坑浣紗街11號5字樓連天台
📍 物業地點：大坑浣紗街11號
🏘️ 物業面積：638平方呎+411平方呎天台
📏 平均呎價：$7,053港元
💰 拍賣開價：450萬港元
📅 拍賣日期：4月15日（星期三）下午3時
✍🏻 物業編號：26041515
🔑 拍賣地點：中環德輔道中84-86號章記大廈３樓Ａ室
延伸閱讀
香港樓市｜唔使3球！屯門黃金海岸476呎銀主盤 低銀行估價近3成 值唔值上車？