【港人外遊/港人去日本/日本旅遊/福岡旅遊】福岡縣政府宣布由2026年7月7日起，推出「Go！Fukuoka」住宿補助計劃，對象係所有訪日外國旅客，當然包括香港人。只要入住福岡市及北九州市以外嘅住宿，經指定海外訂房網站預訂，每人每晚即可獲3,000日圓（約160港元）折扣，連住多晚亦會逐晚計算。活動總預算約2.3億日圓，預計可供7.7萬人次受惠，名額有限，額滿即止！
福岡縣Go！Fukuoka推每晚3000日圓住宿補助
據福岡縣數據，約82%訪日旅客住宿集中喺福岡市，北九州市佔約9%，其餘地區加埋都唔夠一成。縣政府希望透過補貼，吸引旅客走入太宰府、柳川、糸島、原鶴溫泉等周邊地區，同時分散旅客過度集中嘅問題。
邊度用得着福岡住宿補助？
補助只適用於福岡市及北九州市以外嘅住宿設施。換句話說，博多、天神、小倉一帶嘅酒店唔適用。以下係幾個熱門替代地區，由博多出發車程大多約一小時內：
| 地區 | 特色 | 由博多出發交通 |
|---|---|---|
| 太宰府市 | 太宰府天滿宮、九州國立博物館 | 西鐵約30分鐘 |
| 柳川市 | 柳川遊船、鰻魚蒸籠飯 | 西鐵約50分鐘 |
| 糸島市 | 海岸咖啡店、日落靚景 | JR筑肥線約40分鐘 |
| 原鶴溫泉 | 筑後川畔溫泉旅館 | 高速巴士約1.5小時 |
| 八女市 | 八女茶產地、傳統町屋街道 | 高速巴士約1小時 |
點樣拎到每晚3,000円折扣？（3大步驟）
Step 1：選擇指定訂房網站
福岡縣官方只指定以下3個海外訂房平台：折扣：
| 訂房網站 | 折扣開始日期 |
|---|---|
| Agoda | 2026年7月7日起 |
| Trip.com | 2026年7月15日起 |
| Expedia | 2026年7月下旬起 |
小貼士：如果你7月初出發，Agoda係目前唯一用得着折扣嘅平台；Trip.com同Expedia要稍等先上線。
Step 2：預訂合資格住宿
揀住宿時記得確認地點喺福岡市及北九州市以外，折扣會喺預約時直接反映，唔使抵日後申請任何手續。
Step 3：連住多晚照計
同一般住宿優惠唔同，呢個補助連住多晚都會逐晚計算，住得越長慳得越多！二人入住一晚已可節省6,000日圓（約320港元），足夠食多餐好嘢。
福岡周遊巴士同步半價優惠
配合住宿補助，福岡縣同期亦推出「よかバス」（Yoka Bus）巴士團半價助成，金額為車費嘅二分之一。但要注意，呢項優惠嘅指定預約平台同住宿唔同，係經Tripadvisor及KKday預約。適合不自駕、又想玩交通較不便地區嘅旅客。
常見問題 FAQ
Q：香港人用到呢個補助嗎？
A：可以。計劃對象為所有訪日外國人，香港旅客經海外訂房網站預約合資格住宿即可。
Q：住博多或天神嘅酒店有冇折扣？
A：冇。福岡市及北九州市嘅住宿設施不在範圍內，只適用於呢兩個政令市以外嘅福岡縣內住宿。
Q：優惠會唔會提早完結？
A：有機會。活動預算約2.3億日圓，預計支援約7.7萬人次，名額有限，訂房前建議先確認活動仍然生效。
Q：用邊個訂房網站先有折扣？
A：官方只指定 Expedia、Agoda、Trip.com 三個平台適用。
【延伸閱讀】
筍工｜河南老君山6萬月薪請雲海觀察員 包食宿住山頂30日 每日拍一條片好輕鬆 即睇入職要求＋工作性質
遊台注意｜超強颱風巴威襲台 NASA發恐怖風眼照 巨大風暴圈足覆蓋整個九州 國泰往台北高雄免費改票
暑假抵玩旅行團｜$2999起杜拜7天團 阿聯酋航空直航 玩盡哈利法塔＋棕櫚塔 即睇亮點＋成團日期
長榮送機票＋15萬獎金｜香港居民專享 飛美加歐日韓澳洲台灣東南亞 即睇參加方法＋攻略 7.31截止