昨晚（16 日）一集《解風東京》，「日本旅遊達人」杜如風（Helen）去到大家非常熟悉的東京涉谷；八千公石像、十字路口萬人空巷的斑馬線，大家耳熟能詳。今次新景點，是涉谷區立宮下公園，行到腳軟可以到此一遊稍作休息。而且不只有得坐，樓高幾層的公園，依然有得食有得買。

有Helen的節目又點會沒有購物環節，轉眼間她已去到一間有60年歷史；主打DIY牛仔產品的工場，客人可以挑選心儀服飾，釘上自己揀選的鈕扣及名牌，變成獨一無二的自家品牌。Helen揀了件牛仔褸，自選衫鈕、貼牌等配料和加工，為牛仔褲、牛仔褸進行「上鈕」工程，原本價值24,000yen（約1,400港元）的褸，在Helen DIY同着過上身加持後，已經升值不少！

由 杜如風 出山帶隊嘅《解風東京》上一集Helen帶大家到潮人集中地下北澤，10多年前曾經到訪介紹嘅佢，就話今日嘅下北澤同過往已經大為不同，集齊吃喝玩樂於一地。由車站一出嚟嘅橋底已經有食街，主打世界各地唔同美食，好似台灣、越南、泰國等味道一樣有齊，甚受年輕人歡迎。

而由22間店舖組成嘅「東洋百貨店」就係買衫必行之處，Helen形容呢度「乜都有得賣」，所以係東京嘅旺中咁話。店內主打古著服飾，會搵到有唔少大品牌貨品，最平幾十蚊就有交易。Helen就發現一件「C」字頭運動品牌衛衣，只係賣30多港幣咋。唔買唔安樂嘅Helen，之後又用770日圓(約45港元)買咗一件古著名牌大褸。而一班攝製隊一樣購買力旺盛，人均消費1萬日圓(約580港元)。

Helen之後又帶大家去二手黑膠唱片店，比起香港又貴又難搵，呢度嘅二手唱片最平300日圓(約17.7港元)就有交易，無論係少年隊、西田敏行、Morning娘、歐陽菲菲都搵到。

估唔到仲被Helen搵到一張疑似自己好姊妹何超儀封面嘅黑膠碟？其實係日美混血歌手Ann Lewis嘅專輯，望落都真係同超儀相似度超過9成。最後Helen以800日圓(約47港元)買入，打算作為手信。 

真係人有相似，呢張Ann Lewis嘅唱片同Helen老友何超儀真係幾似

而星期一播出嘅一集，Helen將跟住山手線幾個車站玩，先到港人留低唔少腳毛嘅原宿，介紹一間Helen幫襯足10年嘅Polcadot帽店。帽嘅款式以沉實為主，百零二百蚊港紙就有交易。佢仲貶眼就用28000日圓(約1652港元)狂掃9頂帽。

之後佢哋轉往涉谷一間連鎖中古玩具同漫畫店，尋找8、90年代回憶：《小雙俠》、《小露寶》、《電腦奇俠》、《小飛俠》咩玩具應有盡有，仲還有Helen至愛動畫《銀河鐵道999》女主角美達露全套服飾、 假髮同眼睫毛出售。邊睇玩具同漫畫，Helen一邊啍卡通主題曲，唱到《飄零燕》嘅時候，就似乎不經意洩露自己年齡秘密喇。

雖然《銀河鐵道999》原作者松本零士2月離世，不過佢過往嘅作品就一直會留存後世

買夠玩夠之餘Helen又帶大家搵食，佢哋去到惠比壽一間人氣高企燒肉店，CP極高之餘更入選日本美食網站8大名店之一。呢間只提供晚市嘅名店，必食「和牛燒肉盛宴」套餐，9道菜 只需13900日圓(約810港元)，份量老實一個人應該食唔晒。

而套餐中嘅和牛已經唔算特色，重點係一味由靚仔侍應親手泡製嘅「和牛壽喜燒配黑松露」，見到靚仔侍應出力猛刨名貴黑松露、同叉燒心形牛頸脊招呼Helen，搞到9年冇拍拖嘅佢忍唔住問靚仔「你對我係咪有愛啫？」，至於靚仔侍應會點回應，記得留意《解風東京》喇。

到底倫仔會唔會因為一餐飯而覓得真愛呢？

抵食套餐都唔夠喉？Helen就再拜訪一間位於杉並區阿佐谷北嘅隱世壽司小店，呢間小店得6個位，師傅曾經喺美國米芝蓮一星餐廳深造，回流日本後同太太開設廚師發辦壽司店，只提供一款餐牌共18道菜，有時令魚生、炙燒、茶碗蒸等，收費15000日圓(約870港元)， 真係抵到爆呀。

《解風東京》星期一至五晚 21:30 J2