自稱何伯長子轟何伯從沒送貴重禮物給過世何太 「啲錢係阿媽死慳死抵返嚟」

《東張西望》何伯同新何太的愛情成為不少市民茶餘飯後的熱論話題，在現在火紅的Facebook公開社團「何伯＆何伯老婆關注組」有自稱是何伯伯大兒子的聲明，批評何伯「對唔住」已過世的阿媽，又反駁何伯說「那些錢是自己錢」言論。

聲明強調，何爸爸在遇上「嗰個女人」之前很正常，聲明用「河馬」稱呼新何太，說爸爸在沒有與五兄弟姊妹商量下結婚，令五兄弟姊妹非常憤怒，並心知不妙。

聲明指，「我呀媽同佢捱返嚟同我地仔女比家用, 我呀媽好慳, 買餸都會格價先買」, 所以「我地唔容許我地呀媽死慳死底（抵）返來啲錢，比隻河馬一鋪清袋, 試問點對得住呀媽！」

聲明又指出，何伯生前雖對老妻不俗， 但從來沒有送過貴重禮物，「 未見過送幾兩重金手鈪, 勞力士手錶, 手袋之類比我呀媽, 拿上手都幾十萬, 或者可能老夫老妻唔需要」。更加遑論是幾十萬的禮物，所以阿妹才攞錢，以免「比隻河馬得逞」。

聲明發出不足一小時，已吸引數千網民讚好及給「加油」。

有網民慨歎：「我信，因為我屋企都畀人搞到家變，但起碼你哋仲有五兄弟姊妹，我以前得一條友對住個大陸婆，佢連我媽咪條金練同戒指都偷埋。加油，明白你哋嘅掙扎，先保護爸爸媽媽嘅財產，大家撐你哋！」

聲明全文：
大家好, 我係何伯大仔, 我父親原本是很正常, 雖然佢平時講嘢唔叻, 但絕不像宜家上電視咁神智不清(俗稱On9)。自從識嗰個女人之後, 姑且叫佢做河馬, 河馬叫我父親介紹男人比佢結婚, 唔知咩原因, 飲完河馬啲湯水之後, 我老豆自己推薦自己, 冇同我地五兄弟姐妹商量下, 自己同河馬走去簽紙結婚。我地五兄弟姐妹 㷫過火屎, 同時心知不妙, 因為結左婚可以以配偶身分身家。我呀媽在生前, 佢對我呀媽都算好, 但未見過送幾兩重金手鈪, 勞力士手錶, 手袋之類比我呀媽, 拿上手都幾十萬, 或者可能老夫老妻唔需要。我同幾兄弟姐妹點都諗唔明, 點樣可以用咁短時間氹我老豆送咁貴嘅嘢, 幾十萬, 唔係一兩萬。呢刻, 我知我老豆戶口嗰幾百萬將會凍過水, 所以先有細妹攞錢單嘢。唔知係我呀媽保祐定報夢, 可以係隻河馬氹我老豆攞錢之前, 我細妹已經早著先機, 唔洗比隻河馬得逞。同埋我老豆電視上講, 嗰幾百萬係佢自己搵返來, 我想講, 啲錢係我呀媽同佢捱返嚟同我地仔女比家用, 我呀媽好慳, 買餸都會格價先買, 所以我地唔容許我地呀媽死慳 死底返來啲錢, 比隻河馬一鋪清袋, 試問點對得住呀媽! 司馬昭之心－路人皆知, 各位香港市民都知河馬係為咩而來, 我地會循法律途徑, 保護父母財產, 以及已去世媽媽的尊嚴。謝謝