有片｜銅鑼灣男子疑攜小童偷千元模型車　兩人無掩飾動作直接拿走

銅鑼灣發生店舖盜竊案。周六（4月5日）下午1時許，一名男子與一名男童，疑在皇室堡「鴻興玩具」偷走一盒價值約1,000元的模型車，事發後店方報警求助。

兩人無掩飾動作直接拿走模型車

一段由店方在Facebook專頁公開的閉路電視片段顯示，事發時一名男子與攜帶大購物袋的男童在模型陳列櫃旁徘徊。其後二人走至一紅色盒子前，停步交談約十秒。期間男子環顧四周，隨即拿起紅色盒子交予男童。男童接過盒子後，用單手抱起，與男子一同離去。整段片段未顯示二人有掩飾行動或企圖將盒子隱藏。

鴻興玩具：咁細個就教佢做犯法嘢

店方在Facebook發文憤怒指，「皇室堡今日出現兩父子夾埋一齊偷嘢 ！咁細個就教佢做犯法嘢，可恥。全程錄低晒，兩父子孭住布袋 拎起完件貨就即刻走咗，同行要小心。」

影片截圖：

網民斥男子教壞下一代

網民則留言斥片中男子教壞下一代，又有人指應報警求助，「個細佬似一早知拎咗就閃喎」、「呢D人真係不能放過佢，自己仆街仲要教衰埋下一代。」、「返黎比返錢都唔好放過佢」、「報警啦，不要縱容」、「笨賊，係人都知周圍裝滿天眼」、「賊父子，轉頭又話自己只係唔記得俾錢。」、「玩具都偷，冇錢就唔好生仔啦」、「同大埔泰國嘢單case一樣，大家都以為對方畀左錢，誤會誤會」、「想知最後有無報警同拉唔拉到？」、「呢單真係應該報東張」、「教壞個兒子」、「真係明目張膽」、「呢啲人真係要print佢哋個樣出嚟,貼喺舖頭門口等人人認得佢哋」、「影到都冇用,報警都叫你留意下次再嚟偷先捉佢,先會拉到」、「報警啦，要捉」、「自己衰就好啦，仲要教壞下一代」、「如果佢肯比返錢就算啦，要告佢好麻煩」。

警方暫列案件為「店舖盜竊」

警方指，於周六（4月6日）下午5時12分，接獲一名男子報案，指查看店內閉路電視，發現一名男子與一名男童，疑從店內盜去一盒價值1,000元的模型車。警方暫列案件為「店舖盜竊」，現交由灣仔刑事調查隊第6隊跟進。