鴻星集團女食客稱被屈食霸王餐　兩周後突公開向「陳小姐」道歉-東張+

近月本港飲食業掀起不少風波，屢成為新聞焦點，繼海皇粥店結業事件後，鴻星集團亦爆發食客投訴風波。社交平台有女網民發文，稱4月29日在旺角新世紀廣場鴻星中菜午膳時，被經理及侍應誣衊曾「食霸王餐」走數逾千元，事主報警處理。

事發兩周後，鴻星集團突然在社交平台公開發聲明向涉事的「陳小姐」道歉。

女食客稱被屈食霸王餐

該名女士在社交平台發帖，表示與同事4月29日在旺角新世紀廣場（MOKO）鴻星中菜（鴻星海鮮酒家）分店午膳時，被屈食霸王餐。當時，兩位侍應「阿姐」指控事主兩星期前「有張單未埋」。事主否認並強調「第一次嚟」，但仍被「酒樓阿姐」針對輪流圍攻。

其後，酒樓經理告訴事主「個同事睇咗cctv話同你（事主）一模一樣樣」，事主感到愕然並報警處理。最終，經理向她表示一周內向事主給予答覆；事主又在帖文呼籲「如果你去依間嘢食飯、又係女仔、又長頭髮，你就有機俾阿姐話你走數」。

事主帖文全文：

Lunch同同事去酒樓飲茶 俾阿姐屈我食霸王餐走數 贏咗99.9%香港人
警個世先 Moko 6樓
如果你去依間嘢食飯 又係女仔 又長頭髮
你就有機俾阿姐話你走數
因為佢靠老點 老點話你係 咁你就係
唔洗證據 因為阿姐對眼就係證據
事源係 我同我同事 一行8人去飲茶
嗌完嘢食 有個阿姐走嚟收點心紙
話我好熟面口 記得我 咁我諗住個阿姐r水吹啦
下意識仲答佢：「係啊 係啊 有無折打呀？」
之後阿姐 指住我 話我係兩個禮拜前有張單未埋
咁我梗係話無 諗住佢諗錯人
咁佢都好快行開咗 諗住件事完啦
食咗無耐 佢又帶多咗個阿姐嚟認人
：「係喇係喇 係佢」
：「你真係有張單未賣喎」
：「唔係話你有心走數，不過可能成班人嚟食飯事但一個唔記得咗」
我同我同事聽完都r晒頭
心知個阿姐似認真mode wor
都解釋返 我啱先係講笑 我之前無嚟過食
而今次我都係第一次嚟依間度食嘢
咁諗住又完咗啦件事
到到埋單嘅時候 個阿姐拎住張單問
「今次又係咪你比錢呀？」
我決定唔忍喇 直接同經理投訴
經理話 係個同事睇咗cctv 話同我一模一樣樣
我真心下咗出聲 心諗點一樣樣法 我都想睇

鴻星集團社交平台公開致歉

事隔兩星期，鴻星集團周一（5月12日）終在社交平台公開發致歉函，上款為「親愛的顧客陳小姐」，就2025年4月29日之用餐體驗不如理想，表示集團謹此致歉，並承諾加強團隊培訓及監督，以杜絕同類事件發生。

此外，警方早前回覆傳媒指，4月29日下午約2時，接獲旺角一酒家一名食客報案，警員先致電報案人了解事件，報案人指被酒樓員工指早前有賬單未付款。不過，報案人指只是第一次到該酒家，報案人其後表示和經理協商已解決事件，警員最終毋須到場，事件列求警協助案件處理。

鴻星集團致歉函全文：

致歉函

親愛的顧客陳小姐
就2025年4月29日之用餐體驗不如理想, 本集團謹此致歉, 並承諾加強團隊培訓及監督, 以杜絕同類事件發生。

鴻星集團
2025年5月12日

網民不賣帳在社交平台鬧爆鴻星

儘管鴻星已經道歉，但不少網民似乎對今次公開致歉「不買帳」，紛紛在社交平台鬧爆鴻星，「事主最終報警，警察並無到場，只係透過電話調解。」、「其實我覺得呢個post冇誠意」、「又唔講咩事，剩係陳小姐，做騷都做好啲丫」、「去飲個茶，無啦啦比人屈上次無找數，真係九唔搭八！」、「睇嚟好大件事喎！竟然要公開出道歉信」、「竟然冇任何處分或炒人？」、「好少見一個大集團要咁樣出道歉信」、「你一口咬定但人地話要睇片又唔比喎，走數再同咁多人嚟多次都唔合常理啦」、「涉嫌誹謗，求其道個歉就想當冇事？」、「起碼 clarify 返還人地清白啦」、「食個晏，無啦啦比成間舖既人屈，指住黎鬧」、「大集團，市井之徒咁待客，一句道歉就算？」、「點解唔炒涉事員工？」、「PR & Marketing 部門？危機管理處理得好差，變成關公災難！」、「有心就叫晒當日有份嘅出嚟見樣地親自道歉」、「今時今日，仲出呢啲員工服務」、「屈人食霸王餐，公司道個歉就搞掂？」、「解僱係基本動作吧？」、「請解僱有關員工，就咁道歉有咩用？」、「行貨到咁，任何投訴都可以照用呢個範本喎。」、「至少要當時個經理，親自向人道歉啦」、「個陳小姐喺班同事面前乜嘢面都冇晒， 咁樣俾你同事屈」。