再有人在公眾地方「偷電」被發現！周日（7月13日）晚上，一名中年女子公然在天星小輪上「拉線偷電」為手機充電，並煲電話粥，行為引起網民關注。
紅衣大媽天星小輪拉線「偷電」煲電話粥
有網民發帖，指事發於晚上約9時08分，一名男乘客在社交平台發文並上載影片，指該名身穿紅衣的大媽在由灣仔前往尖沙咀的航程中，將白色充電線接駁至船頂插蘇，邊充電邊講電話，場面相當顯眼。
影片顯示，插蘇設於船艙天花板位置，距離地面約半個人高度，大媽需他人協助才能插上電源。樓主表示：「埋岸前個大媽叫個男人幫佢將個插蘇插上上面。」他坦言當時未有即時阻止：「我淆底冇出聲啦，同船都冇人出聲。」直至落船時，他才向船上水手舉報，水手其後似乎有上前制止。
網民時代廣場煲西米露翻版
本月初亦曾有女子在銅鑼灣時代廣場使用商場插蘇煮西米露，被保安勸止，今次事件引起網民聯想一起及討論，有人形容場面有如「煲西米露翻版」，亦有人貼出更多親眼見過的偷電情況，「可以帶插蘇出街但唔帶尿袋, 其實究竟咩玩法？」、「專登玩膠定係真心膠」、「佢地真係好癲，我上個星期喺銀行都見到個大媽用插頭叉電」、「其實而家好多商場都有得免費充電，點解係都要死去其他地方叉電」、「無恥既冠軍」、「好無家教，好肉酸。」、「叉到電咩？以前做過天星小輪電器，佢哋行DC個喎」、「無公德影響巿容」、「試過啦，直接入我舖門口掣位叉電」、「佢地真地好鐘意貪小便宜搵著數」、「唔明點解成日要差電，電話連一日都捱唔到？」、「充電講電話，因住電親」、「其實大陸係咪真係咖啡店之外嘅地方都預設可以借電⋯」、「大陸高鐵係咁樣差電，個插蘇位喺天花位」、「萬一佢個插蘇有咩問題，真係成船人陪葬」、「海港城都見過，一間名錶店旁！」、「冇文化冇腦真可怕」、「點解出嚟大城市仲要做埋d丟人現眼嘅事」、「下次可以帶埋個煲上去煮個麵食」、「佢地真係乜都做得出」、「無入機房算係咁啦 」、「任何地方都可以當係自己屋企」。