近日國際白銀價格屢創新高，成為大眾將閒置舊銀飾「變廢為寶」的好時機。有網民指，家中有多件購自Pandora品牌的銀飾，惟大部分已損壞、斷扣或不再佩戴，所以將其帶到回收貴金屬的店舖放賣，成功套現約1000元。
近日，有網民在社交平台Threads發文，指家中有多件「洗壞咗嘅 Pandora，同埋斷咗扣、好舊宜家唔鍾意唔再戴嘅銀飾物。」
樓主表示，原本打算將這些銀飾品當作垃圾丟棄，後來發現原來可以將其放售，決定將首飾帶到收購貴金屬的店舖去回收。
舊銀飾成功套現1000元
當天，店內回收純銀價為735元一兩，而樓主的舊銀飾總淨重2.5兩，成功套現約1000元。她興奮直言：「以為冇咩價值，好彩冇丟落垃圾桶！雖然銀同金價差好遠，收返小小錢都好呀。」 
網民驚訝：原來Pandora都收
帖文引起網民熱議，不少人對舊銀飾可以換作現金感到驚訝，表示「估唔到銀都有人收，仲要Pandora都收」、「多謝你呢個post，我細個買埋好多，而家都唔會帶，可以變返錢了」、「Pandora真係時代眼淚，喺屋企擺到黑曬，終於搵到Solution」、「我20年前都好喜歡買銀飾物，而家年紀大咗都冇帶了，上年搬屋直情想掉，不過其實好靚唔捨得，所以冇掉，而家知道會有地方收可以諗下，不過真係全部好靚，到時捨得就賣。」
亦有網民對回收價錢提出疑問，「想知樓主點計？因為見你張單寫2.5兩，而店方收個價錢係$735一兩？咁應該都有$1800幾？」樓主則回覆指：「99.9純銀就係$735，銀條銀幣嗰啲；Pandora係925（92.5%的標準純銀）；有啲冇牌子原來冇925，又扣返水晶同石，最後個價$1000左右。」
Credit:Threads@choupettech