網上近日瘋傳一段車Cam片段，拍到一輛 BMW（寶馬）私家車在東區走廊行駛期間，疑似高速左穿右插，猶如玩命拍電影《烈火戰車》，最終因跣呔甩尾幾乎橫掃行車線，險些釀成嚴重交通意外，嚇得後車司機急煞避禍。
東區走廊BMW寶馬學「烈火戰車」
從車Cam影片所見，事發時為夜間，東區走廊車流正常，遠處可見港島多幢住宅及商廈燈光。涉事的深色BMW原本在中線及左線之間高速行駛，其後突然快速切線。
在數秒內，BMW車尾開始明顯擺動，輪胎疑似失去抓地力，出現跣呔情況，車身隨即甩尾橫向打轉，幾乎橫跨多條行車線。片段中可見，BMW車身一度橫置在快線及中線之間，與後方車輛距離極近，險象環生。幸好後車反應及時，立即收慢，最終未有發生碰撞。
後車煞車不及或致多車相撞
影片在網上流傳後，引起大量網民討論，不少人留言直斥涉事司機行為危險。有網民狠批：「真係當條路係賽道」、「學乜鬼烈火戰車，差啲玩死後面啲人」；亦有人留言指出：「一失手就連環車禍」、「唔止害自己，仲連累晒其他司機」；更有網民諷刺：「馬力大唔代表你揸得掂」、「寶馬唔係問題，問題係揸車果個」。此外，不少留言一致認為，若當時後車煞車不及，後果可能非常嚴重，甚至涉及多車相撞。