網上流傳一段約17秒車Cam片段，顯示一輛開斗貨車在吐露港公路行駛期間突然跌貨，石屎板從車斗滑出，情況危險，引發關注。
吐露港公路貨車跌石屎板
片段顯示，事發於周二（6月2日）下午約4時47分，一輛開斗貨車沿吐露港公路往上水方向行駛，當時車斗內堆滿物件。當車輛駛至近林村一帶時，一塊石屎板突然從車上跌出，重重落地並揚起大量灰塵。
其後，石屎板落地後仍有餘勢，沿路滑向路肩位置。拍攝片段的私家車當時正於後方相鄰行車線行駛，司機見狀立即向左輕微轉向避開，成功避過可能撞擊。
網民稱「要去還神」
該車Cam片主在社交平台發文指，「早2秒都bye bye咗」，形容差點出意外；其後亦有不少網民留言回覆，「你真係要去還神」、「所以唔好同大車平排而行，老生常談」、「呢啲正pk，做佢救世人」、「佢應該仲跌左木板，我行過左，左邊兩條軚，漏緊氣。」、「嘩，佢做乜唔落條飛機帶，離心力要跣出去」、「好彩塊嘢滑咗去路邊，如果係馬路中間，死得人多」。
警方表示，於同日下午4時51分接獲報案，指一輛貨車在上述路段行駛期間，掉落石屎板等物件。其後至4時56分，再接獲一名姓文、44歲司機報案，指同一位置有貨車跌下石屎板，情況驚險。據了解，該名司機當時險被掉落物件擊中，所幸最終未有發生碰撞或造成人員傷亡。