宏福苑大火發生第九日，有大批市民、志願團體自發送暖。危難當前，我們最需要是聽到點點愛的關懷。
繼巴士車長暖心「神級操作」後，今次事件，再次看到「的哥」飽滿愛一面！有脆友dominicyauuu在社交平台threads，特別表揚某位的士司機的義載行為：「曾先生，從此以後我對的士佬改觀。」
「今日大埔大元邨上的士，平日返去大約$50，上車一陣發現司機無禁錶，點知司機自己主動講：
🚕：「我義載架，你帶一帶路，我唔熟大埔」
我：「吓, 唔好啦, 你收我錢，留比有需要既人」
🚕：「唔好呀，我今日夠數呀，你比我做啲嘢，等我個心好過啲」
我：「吓，唔好啦」（個心即刻諗，得！我陣間掉低錢跑走）
點知，落車想掉低錢之際，對方好大反應拒絕，叫我比機會佢做啲野，只能夠講，好啦！我會捐咗佢🙏🏻，香港人其實好有愛，每人都盡吓自己能力。」
「的哥」鐵漢柔情義載送暖｜網民為的士司機護航：祝司機哥哥日日有靚旗
義載帖文po出後，有網民大讚成件事好有愛！
「一個求對方收錢，一個求對方唔好比錢🤣成件事勁cute，好人一世平安❤️ 」
「行新界嘅的士好多都好好人」、「大埔司機，搭親都好好人」。
「的士司機咁做，自己都會好過啲，幫緊人嘅時候，同時都係幫緊自己。而妳咁做，妳都係間接幫咗的士司機。」（好有哲理之餘，更好有大道理。)
「真！將愛蔓延開去。」
「咁又唔係個個的士佬都咁衰嘅，司機哥哥好人一生平安，日日有靚旗。」
「睇電視見到當晚運送物資好多都係的士。」
「香港雖然好細，但勝在仲有一班好有心同有素質的香港人。」
圖片來源：dominicyauuu@threads