飼養寵物，是一生的使命。大家也是家人，是共同生活，不是圈養。有一家疑似寵物店的網頁近日出帖文，內容關於一條「出租貓朋友」的招徠，竟是提供上門試貓一星期服務，美其名是體驗成為家人，還給你幸福選擇買賣合約！一系列懷疑賣貓、租貓的內容，令一眾貓奴大感譁然。
疑似寵物店Threads專頁petbookhk，張貼了兩張新的「活動」宣傳海報，並配文解釋店舖所提供的新服務：
「仲猶豫養唔養貓？Petbook 推出超暖心一星期上門試貓・體驗成為家人」計劃～我哋將合你眼緣嘅貓BB + 全套入屋套裝，直接送到你屋企！一對一上門教你照顧、餵食、幫貓咪適應新環境～」
七天試養期後，你有兩個幸福選擇：
🏡 成為家人 → 自動變成60天健康保證買賣合約
保證金$6,500 全數豁免！毛孩正式成為你屋企一份子♡
🐾 結束體驗 → 歸還後退回$6,500
.
一星期試貓體驗費：$800
上門送貓費：港島$300 / 九龍$400 / 新界$500（自行到店免費）
.
文末，專頁Post還形容叫大家預約你的「試貓家庭」，還要講明「限量名額」。
「出租貓朋友」有貓店提供上門試貓服務全城貓奴震怒｜貓奴：基本上同賣貓無分別
這個「試貓家庭」創新活動，簡直越看越不妥，一眾貓奴更為之震怒！紛紛圍剿公審要檢舉、鬧爆、痛心！
簡直是無言，與賣貓沒有分別。
「係咪黐線，貓去新地方已經會驚要適應，仲標榜可以換嚟換去。 」
「大把人會課金，本身賣貓都要無良先做得出！」
「係咪黐線㗎 ？！首先基本上同賣貓無分別，其次遇到唔好嘅或者變態嘅人，即係$7000殘害一隻貓？都未計有機會將一隻貓貓變成一個人球，俾人不停運去唔同地方，而貓係一個容易怕陌生地方嘅動物，咁樣同虐待貓有咩分別？🤬🤬🤬 」
「你哋係咪真係愛貓…..知唔知道貓好驚換環境會好焦慮呀😵💫 」
「貴公司可以提供咁優質嘅三連服務
1.賣貓
2.培育基因有缺陷嘅貓去賣
3.培育基因有缺陷嘅貓先租後賣
我諗愛貓網民都可以承諾你三樣嘢
1.每月漁農處突擊檢查
2.每日有心網民電話問候進度
3.每分每刻Food Panda Keeta無限外賣代訂送上門」
「貓係一種好敏感嘅生物...換地方住，閒閒哋都一兩日唔食嘢，平時一個唔開心就我病啦😀，唔好彩FIP就嗰頭近。」
「痴孖筋，當隻貓係電視機咩，一星期體驗唔啱就退貨！？」
「如果隻貓俾人玩完，退返俾你哋，又去另外一家人又俾人玩一輪，過咗黃金期賣唔出，咁你點處理隻貓？🤬🤬🤬🤬 」
「出租埋你自己嘛，生命唔係比你咁玩！」
而到目前為止，該「試貓體驗」的帖文仍未被刪除，不少貓奴網民更一舉截圖留底，實行要追究到底！怎樣也好，動物的生命，你可以不愛，但絕不能傷害。
與賣貓沒有分別的試貓服務，可能會間接摧毀一隻貓貓生命。
圖片來源：petbookhk@Threads