拜祭先人講求心意，孝子賢孫事前總會準備各式祭品，而近日就有一名男網民在社交平台怒斥，有殯儀公司早上將喪禮祭品送抵柴灣歌連臣角靈灰安置所後，因無人看守懷疑遭人盜走。他直斥「痴X線」，帖文引發網民熱議，有人斥「偷先人啲嘢？要折壽㗎喎」、「7月14先嚟偷，祝佢好運」。
事主於社交平台以「偷祭品」為題發文，指近日籌辦喪禮祭祀先人，殯儀公司將祭品預先送抵歌連臣角，因早上送達當時沒有人看守，其後祭品被人取走。他表示是殯儀公司致電並WhatsApp通知「唔好意思啲祭品畀人偷咗」，他即冒雨重新購置祭品。
事主樓主根據殯儀公司傳來的照片推測，多間殯儀公司及石廠都在同一間訂祭品及附薦包，一早已送去歌連臣角，每個裝有祭品的紙皮箱都貼上印有殯儀公司名或師傅名的A4紙，附薦包亦已寫上預訂的先人名及日子，並指「應該唔關啲職員、清潔姐姐事，佢哋今日個個都好nice好幫手」。他又指所屬殯儀公司沒有向他收取祭品及附薦包的錢，由公司自行承擔。帖文引起網民熱議，有人指「好偷唔偷，偷先人啲嘢？要折壽㗎喎」，亦有人建議報警調閱閉路電視，更有人懷疑是殯儀業行家取走。