有觀眾提供片段向東張西望報料投訴，並提供片段指，金鐘統一中心運輸署3樓每日都懷疑有「排隊黨」輪籌，甚至會出售這些籌號，嚴重影響。普通市民攞籌，觀眾本人的丈夫先後兩次去排隊都無法攞籌，所以非常憤慨。
觀眾向東張西望投訴，指丈夫先後兩次去排隊，都因為一班人插隊而無法攞到當日籌號。結果第三次要清晨7時10分排隊，才拿到每日派的60個即日籌。她指出：「有啲係可以上網搞，但係有啲要親身去攞籌先搞到。 」
「3月27日7時10分，前面大概十幾人排緊隊，頭嗰十個全部都係相信排隊黨嘅人，全部係女人有啲仲係阿婆嚟。 佢哋嗰啲七彩凳全部一色一樣，好專業，地下亦都有報紙呀背囊呀喺度霸位。 」觀眾說。
「咁我就影相畀我老公睇畀佢知個環境，期間應該係黨員嘅白色裙女人就喂我唔好影相，佢以為我影緊佢，我就話呢做公眾地方，同埋我都唔係特登影佢。」她質疑對方收錢排隊，「所以咁驚」。
她說，當其丈夫抵達後，「即認到白衫連身裙女人每一次都喺度，而差唔多8點45分排隊黨就會叫自己友去插隊，所以經常令到後面排隊嘅人冇籌。 而派完籌之後前面嗰班黨員就會問攞唔到籌嘅人賣籌。」
她稱，當時見「排隊黨黨員」不停問後面隊尾嘅人賣籌，但未能聽到賣籌價，「又聽到佢哋對話，如果自已唔想親身嚟，想叫排隊黨幫手排隊搞手續，費用係500蚊一次」。
她憤慨：「肯定嗰度嘅商場保安或者運輸署嘅員工每日都見到呢班排隊黨，但當然佢哋不會理會。 白色裙嘅女人九點前就會安排唔同人去到佢嘅成員中插隊！ 」她認為賣籌同插隊嘅風氣非常不要得。
「東張＋」已就相關情況向運輸署查詢，但署方暫時未回覆他們是否知情或有沒有方案跟進。