再見‧枕邊人｜張曦雯黃智雯鬥戲有火藥味「晴勝CP」羅天宇扮猩猩壁咚冧女

馬德鐘、黃智雯、張曦雯、羅天宇、徐榮、鄭俊弘、尹詩沛及杜燕歌等主演嘅愛情懸疑劇集《再見‧枕邊人》，劇情越嚟越緊張，喺13號晚嘅一集劇情講述「心機女公關」朱善美Rachel（張曦雯飾）同未婚夫楊萬森（馬德鐘飾）、準繼子楊志鶱（劉宸熙飾）及其父朱賢達（杜燕歌飾）到影樓影全家福，還刻意安排晴天（黃智雯飾）來到影樓宣示主權。

「晴勝 CP」深受觀眾喜愛。兩人互動親暱，晴天飲醉酒，長勝孭住佢畫面勁有韓劇feel。

晴天懷疑爆出盧國峰醫生（魯振順飾）醜聞之人係善美，喺影樓當面對質，惟苦無證據，兩女互寸場口「戲」味十足。晴天返到律師樓仍然氣憤難平，向金長勝（羅天宇飾）大發脾氣，令向來對晴天關懷備至嘅長勝，出盡法寶為博紅顏一笑，不但任由對方「咬手」發洩，又不惜模仿猩猩氹晴天開心。

每次晴天「訊息召喚」，長勝必定「運輸兵」隨傳隨到。Rachel 影樓影全家福。Rachel VS 晴天互寸場口火藥味濃！

另一幕Rachel裝作唔小心向心聲員工洩漏婚訊，刻意要晴天難堪，晴天急召柴可夫長勝嚟接佢走，及後二人喺海旁邊欣賞日落邊把酒談心，借酒澆愁嘅晴天不時靠向長勝肩膀，又一支啤酒兩份飲，「晴勝CP」開始有種甜蜜感。之後長勝又喺浴室門前向晴天壁咚，仲鬼馬問晴天：「負唔負責任先？」畫面既浪漫又搞笑！

長勝整蠱晴天，叫佢「酒後負責任」，仲喺浴室門前上演韓式壁咚！

羅天宇喺劇中完美演繹超級暖男，受訪時佢表示好喜歡長勝角色，外表睇落爛撻撻，但內裡有一顆善良溫柔的心：「好多網民鍾意我同晴天嘅互動，雖然好多吵吵鬧鬧，但係好關心同保護對方，幾鍾意呢個對比。」向來係怕醜仔嘅天宇直言收到劇本時，已很想將這種感覺放大呈現出來，順勢向觀眾派心心：「扮猩猩呢啲除咗希望氹到晴天開心，都想氹到觀眾開心，希望觀眾感受到我為角色花嘅心思。」

長勝即使「假狗西裝」上陣依然讓晴天披上西裝褸，超暖心！羅天宇扮猩猩除咗博紅顏一笑，仲想氹觀眾開心！

長勝另一方面發現被人安裝偷聽器，認定係萬森所為，設局裝彈弓令萬森中計斷正，但佢反咬長勝接近晴天另有企圖。之後萬森拆解到晴天日程表內容，與好友「老鬼」魯正輝（徐榮飾）挖出晴天當年埋藏喺泥土中嘅錄音機，內容為萬森與晴天嘅對話，令當年晴失蹤嘅因由再添線索，不過萬森就將錄音機毁壞，想知仲會唔會有更揭秘就要留意劇情。

長勝設局裝萬森彈弓。萬森與老鬼挖出晴天當年埋藏嘅錄音機。究竟係唔係萬森想害晴天！？種種線索都將矛頭指向萬森！