再見‧枕邊人｜李君妍立定一字馬抗花痴阿七 兩劇同步現身粗獷斯文一樣得

懸疑劇《再見‧枕邊人》星期五晚嘅劇情焦點集中喺Kandy( 吳嘉儀 飾)同天狗( 麥秋成 飾)身上。經晴天( 黃智雯 飾)同長勝( 羅天宇 飾)落力調查，原來「浮誇花癡千金」Kandy當年嘅救命恩人正係天狗；雖然天狗一再強調當年只係想賺錢而非英雄救美，不過仍遭Kandy死纏不放，嚇到天狗走夾唔唞…

君妍為救心上人與花痴阿七決戰

喺天狗、長勝同Kand 混戰期間，情傾長勝嘅Kimchi( 李君妍 飾)突然殺出，仲同Kandy不打不相識一見如故！每次客串劇集必定成為焦點嘅李君妍，呢次出場方式相當特別，斜肩小背心加短褲大晒長腿之餘，一出場就大展好身上做出「貼牆式一字馬！」此招一出，觀眾即紛紛留言大叫「功夫妹」，盛讚君妍樣子甜美、身形勻稱，身手更相當了得。

浮跨千金阿七以為世上所有事都可以用錢解決

其實君妍真係食過夜粥，曾接觸南拳套路大約三年、又跟過知名動作女星楊盼盼學過詠春同泰拳，更曾參與綜藝節目《功夫新星》同《明星運動會》等拍攝。提到今次一出場就技驚四座，君妍笑指為呢個鏡頭擘髀擘足大半日，如觀眾鍾意就非常值得

阿七為追麥秋成真係出盡法寶

「好彩平時自己都會鬆一鬆啲筋，亦好感恩監製淨係要求一字馬嘅小劇情，都會諗起可以用到我。我拍之前都有keep住warm up，但因為拍攝要多角度，變咗都要長時間做住個動作，嗰日可以話大半日我都係做住嗰個動作， 係有啲攰嘅。」今次除咗騷身手，佢嘅角色仲花癡上身，追住羅天宇瘋狂又攬又錫， 相當進擊。 

君妍發現阿七並非情敵之後就化敵為友喇

其實前晚嘅《婚後事》君妍都有客串演出，對手一樣係天宇，扮演天宇角色「天暉」其中一個相親對象阿June。阿June設定同Kimchi截然不同，除咗造型變為清純鄰家女孩，表達愛意嘅方式亦相對內斂，靠家常小菜蒸肉餅傳情，而且對於愛情同婚姻睇法亦相對傳統，一睇就知係典型「賢妻良母」型乖乖女。

君妍扮完烈女，《婚後事》嘅演出就非常小家碧玉

對阿June一角君妍同樣駕馭得宜，獲觀眾大讚「娶得過」。而最近兩個角色都被讚，君妍就非常開心，而撞啱同一時間向觀眾展現兩個完全唔同嘅角色機會亦好難得：「呢個巧合唔係咁易，好開心可以畀觀眾喺短時間內感受到自己做唔同角色嘅反差，亦好開心唔再被定型為只係打得嘅演員。」

更幻想同天宇一齊變老白髮齊眉

外表剛強嘅佢仲笑言現實中自己比較似阿June，對感情嘅思想同要求都較為簡單，不過如果講到演戲，佢就鍾意Kimchi多啲喇： 「Kimchi好玩啲，因為我自己本身都唔係咁活潑同活躍，變咗可以喺劇入邊畀到另外一面大家睇，我覺得係好享受同樂在其中嘅。」

《再見‧枕邊人》星期一至五晚 20:30 翡翠台