星光路上丨怕醜仔羅天宇為事業 衝破心理關口破格演出

羅天宇 作客《星光路上》接受主播 潘盈慧 訪問，自細學游水、溜冰同畫畫多才多藝嘅天宇，當年喺澳洲留學，放假返港時就跟咗細佬去學跳舞，點知一跳就覺得好有型，仲專登停學一年專心學習，仲機緣下透過拉丁舞老師而成為《舞動奇蹟》嘅舞蹈員，最後由媽咪幫佢遞表報名參加咗2016年《香港先生選舉》，當年佢參賽諗法係識多啲朋友，一齊受訓，點知最後獲得少年組冠軍。

入行初期，天宇都係演小角色，直至懷疑演員係咪適合自己時，佢就加入時裝處境喜劇《愛回家》，天宇話嗰五年時間喺丹爺劉丹、林漪娸、黎諾懿同徐榮等身上汲取演技嘅節奏，每當聽到觀眾鍾意自己嘅演出又有好大滿足感， 就令到對演員工作興趣越嚟越濃。

天宇話去到30歲嗰年，喺單親家庭成長嘅佢，突然有種孭起頭家嘅感覺，加上媽咪年紀開始大，變成令自己壓力好大，佢話接拍《跳躍生命線》時就好努力操弗同做好每場戲，因為覺得再唔把握好機會就死，佢指當時壓力大到生白頭髮同甩好多頭髮。

直至《香港愛情故事》首次擔正男主角，佢話當刻感覺好真實，佢講笑話可能當時導演林肯想搏一搏，直至最近兩部熱播劇集《婚後事》同《再見‧枕邊人》中，佢嘅破格演繹更令觀眾眼前一亮。提到一場佢喺《再見‧枕邊人》只係着條孖煙囪喺尖沙咀鬧市嘅場口，天宇話當時條街真係好多人，非常尷尬，因為冇嘢可以遮到成身。