曹敏寶獲家人戰友粉絲送愛 舉辦入行20年最大型生日派對

《中年好聲音》唱將 曹敏寶 舉行生日會，同粉絲慶祝3月17號嘅38歲生日。見到父母、老公、一對仔女同埋《中聲》嘅戰友到賀，Mable話入行20年，首次舉辦咁大型嘅生日會，佢自爆心情好緊張，因為一直好怕成為焦點，但諗到20周年呢個日子，就決定要舉行。

Mable話有唔少粉絲係由佢出發燒碟時已經支持自己，咁多年來不論佢肥與瘦，都無理其他嘢，只會擔心佢嘅健康，就好似家人咁樣關心佢。

身為Mable閨蜜嘅 林若盈 仲約埋《中聲2》嘅戰友一齊出席，佢衷心祝福Mable要一直咁開心，仲講到自己參加《中聲2》嘅原因，係因為見證Mable參賽後越嚟越開心。Mable話賽事除咗提升唱功，仲會令外在提升。