張敬軒讚圭賢翻唱廣東歌有誠意 蕭敬騰演出high到除衫

一連兩晚嘅戶外音樂節首次嚟香港舉行，當中雲集張敬軒、RubberBand、五堅情、蕭敬騰、A-Lin同宋念宇等，本地代表軒公喺第二晚登場，甚少參加音樂節嘅佢，話好開心可以同唔同歌手嘅fans交流，仲話呢個係一個好好將自己介紹畀其他fans嘅機會呀。

講到圭賢日前喺香港演唱會翻唱軒公嘅歌，軒公就話自己都有留意，又讚對方唱得好聽過自己，同時覺得韓國嘅藝人好有誠意，嚟到香港開騷會特登學廣東歌。另一組香港代表RubberBand就話好鍾意喺戶外開騷，所以呢晚佢哋都玩得好盡慶。

至於台灣歌手蕭敬騰同A-Lin，就分別為第一同第二晚作壓軸演出，有雨神封號嘅老蕭仲打破宿命，全程演出都冇落雨，越唱越high嘅佢仲唱到除褸呀。對上一次已經係2018年嚟香港嘅A-Lin，就話因為好耐冇同香港嘅fans見面，所以令佢非常緊張。

至於近年成日嚟香港同fans見面嘅五堅情，提到早前台灣發生嘅地震，成員之一嘅婁峻碩仲特別多謝好朋友Tyson Yoshi慷慨解囊，又指因為當時Tyson都身在台灣，所以對方完全感受到地震有幾可怕。