逆天奇案2丨 79歲尹光首度拍無綫劇飾演頑固老人與容天佑合唱首本名曲《荷里活》

TVB劇集《逆天奇案2》逢周一至周五晚八點半翡翠台播映，噚晚（12日）呢集最大焦點絕對係首度拍攝無綫劇嘅「光B」尹光！劇情講述地產發展商欲收購河埔村用地作發展用途，整條村獨欠頑固老人昌伯（尹光飾）唔肯賣地，令剛升任村長嘅啟熙（謝東閔飾）非常頭痕，多次苦勸昌伯食白果。

噚晚一集有光B驚喜客串，光B中氣十足，劇情講謝東閔同Hana勸唔掂光B賣地。

有日被灌醉嘅啟熙再去昌伯家進行遊說，遭激動嘅昌伯拎起拐杖狂打，啟熙一時情急將昌伯推倒，翌日傳出昌伯死訊，啟熙因此被控誤殺，啟熙嘅懷孕太太恩（菊梓喬飾）頓失依靠，並請求Hazel（蔣祖曼飾）幫助。事件後嚟出現反轉，森Sir 接手調查後，發現黑幫為咗迫昌伯搬走，出招令昌伯嘅家斷水、斷電兼cut埋電話線，昌伯最終死因係家中平安鐘失靈以致失救致死！

有一日，飲醉酒嘅東閔同光B因為賣地問題再次發生爭執。

光B現身《逆天2》令網民大感驚喜，現年79歲嘅光B將角色頑固特質演繹到位，講對白時中氣十足兼相當流利。《逆天2》係光B首次拍攝嘅無綫劇集，問到為咩願意接受挑戰？光B受訪笑言：「係監製家豪哥邀請嘅，佢叫到咪試吓囉。」問到拍攝難忘事？光B笑言：「因為今次入咗新界嘅村屋拍攝，嗰度又多樹，當日又咁啱落雨，好多蚊蟲，咬到周身都係！」光B坦言覺得拍劇挺好玩，事前自己亦做足準備功夫，佢覺得背對白幾難，但要將勤補拙，只好讀多啲背熟啲，光B認為最緊要角色適合自己，鍾意向難度挑戰。

東閔唔小心推跌光B。

官方釋出相關拍攝花絮，光B與菊梓喬及謝東閔有不少對手戲，三人合作得相當愉快，光B未埋位前更與菊梓喬合照留念。問到與兩位合作感覺，光B大讚二人Very Nice，又好傾又好玩，而有「廟街歌王」之稱嘅光B，喺花絮片更孖住容天佑合唱首本名曲《荷里活》。

翌日光B被發現身亡，東閔被控誤殺。東閔感自責並打算認罪。展鵬發現光B屋企電話線被人動過手腳。蔣祖曼為村長啟熙打官司，喺庭上指昌伯被黑幫逼遷，出招令昌伯的家斷水、斷電兼cut埋電話線。昌伯最終死因是家中平安鐘失靈以致失救致死！光B同東閔、Hana合作愉快。光B大讚兩位後輩好照顧佢。同場加映，光B同容天佑合唱《荷里活》。