逆天奇案2丨陳展鵬爆林夏薇行樓梯行到腳震 蔣祖曼指黃智賢表演慾強

陳展鵬、林夏薇、張頴康、黃智賢同蔣祖曼喺熱播劇《逆天奇案2》入面合作無間，戲外老友鬼鬼嘅佢哋，做訪問時互相「出賣」互爆對方拍攝時搞笑一面。
唔少觀眾希望陳展鵬同林夏薇呢對可以重修舊好。
陳展鵬與林夏薇呢一對，唔少觀眾都期待佢哋可以重拾舊好，劇中陳展鵬約林夏薇見面，表白希望同對方復合但被拒一幕，觀眾睇時揪心，但原來劇組拍攝呢幕時都相當辛酸！因為佢哋要行超過 1000 級樓梯、喺一棵大樹旁拍攝，除咗行到氣咳外，陳展鵬仲爆有做開運動嘅薇薇，當日都行到腳震！
林夏薇為拍這幕戲行到腳震。
對於被爆「腳震事件」，林夏薇解釋因為拍攝當日係黑雨警告，劇組係冒住畀雷劈嘅危險去拍，薇薇話：「真的有個雷兜頭劈落嚟，等咗幾小時先稍為雨停，爭取時間步行超過 1000 級樓梯上去，拍完再趕快落樓梯，驚又再行雷閃電，呢個人（陳展鵬）就在笑我是否落樓梯腳在震，我的確是控制不到肌肉，因為腳好攰，不停在顫抖，被他發現了，常拿來取笑我。」
張頴康被指係全劇最爽YY嘅一人。
講到全劇最舒服嘅主角，大家都話一定係張頴康，因為佢經常可以偷閒去練高爾夫球，對此張頴康話因為佢呢個角色係喺監獄入面嘅精神病人，唔使化妝同梳頭：「所以我有好多時間等大家埋位，又對住成個草地，既然我車尾長期有兩枝高爾夫球棍，當然要利用時間練習啦，點知畀工作人員拍低咗，話我真係似足精神病人，所以呢個角色我唔使培養情緒，一嚟就入戲。」
張頴康喺《逆天2》演精神病人。
陳展鵬透露佢同黃智賢劇中經常都有劇烈打鬥動作，有次薇薇終於有機會一展身手，但單單係一個起飛腳嘅動作就踢足個幾鐘，估計起碼踢咗 50 次以上，之後展鵬問薇薇拍打戲好唔好玩？薇薇即話：「真係好攰呀！腳都瘀哂！」
蔣祖曼偷拍黃智賢偷偷練歌。
而喺劇中同黃智賢Ben勁Sweet嘅蔣祖曼Joeman，就爆阿Ben表演慾相當強，等埋位時成日唱歌，十足開籠雀一樣，Joeman話：「有時拍到半夜突然傳來午夜歌聲，佢話可以令大家唔眼瞓，不過佢真係唱得好好聽，仲畀我偷拍到他，我成日都問佢幾時帶我去登台。」阿 Ben亦讚 Joeman 唱得好聽，原本《逆天》首輯播出後，都想一齊情侶檔登台，可惜因為疫情而擱置，阿Ben話自己都等緊機會再同對方一齊去唱歌，而Joeman則表示自己隨時都可以配合同阿Ben去掘金呀。