張馳豪預告剝衫騷肌演出 孖潘靜文林智樂開騷

潘靜文、張馳豪同林智樂喺2021年參加《聲夢傳奇》入行，過去三年佢哋喺工作上有唔少合作，私下亦老友鬼鬼，嚟梗下月中仲會首次聯手舉行音樂會，仲會係呢個音樂會系列演出嘅首個組合。為咗配合「First Jump」主題，佢哋喺拍攝海報當日，足足跳咗8個鐘，不停做跳躍動作。

Felix早前約埋Aska一齊去見偶像A-Lin，仲大膽邀請對方聽自己新歌。

操肌弗爆嘅Aska，日前喺新歌MV以魚網背心、透視恤衫大尺度演出：「我拍MV之前已經比平時再爆seed操肌同控制埋飲食，因為想將自己最好嘅一面喺台上騷俾大家睇，嚟緊開騷我都要繼續再爆seed操，希望到時效果比海報更加『爆肌』! 」至於個唱上會否同MV般大尺度演唱新歌，Aska大方話：「台上除衫騷Body一定冇問題！會構思其他大尺度嘅演出，而家要就先賣個關子！」

操肌弗爆嘅Aska，日前喺新歌MV以魚網背心、透視恤衫大尺度演出。

Felix早前約埋Aska一齊去見偶像A-Lin，仲大膽邀請對方聽自己新歌：「其實當日仲撞到我哋《聲夢》導師 Gin Lee、泳兒同Janice，我有逐個邀請佢哋嚟睇騷，公司同事笑我有鋪『邀請癮』，去到邊都邀請人，做咗人肉流動宣傳！」

Felix自嘲有鋪邀請癮，去到邊都邀請人，做咗人肉流動宣傳。

Sherman被問到怕唔怕兩男一女組成「嬲」組合，佢話：「 佢兩個私底下係隻甩繩馬騮咁，希望去到綵排同演出嘅時候，唔會畀佢哋激到氣絕！不過，歌單方面都想可以搵啲合唱歌，又或者有啲位可以合埋我哋三把聲去唱，仲諗緊會唔會可以re-arrange啲歌去呈現出嚟！」
Sherman被問到怕唔怕兩男一女組成「嬲」組合。