麻雀樂團丨李佳芯自爆牌技高超可演爛賭婆 譚俊彥唔識甩牌勁蝦碌

新劇《麻雀樂團》舉行拜神儀式，一眾演員包括譚俊彥（Shaun）、李佳芯（Ali）、郭柏妍（Rosita）、黃庭鋒、姜大衞、謝東閔等都有出席，阿Shaun仲同大家介紹佢劇中嘅屋企，睇上去佈置得好用心，就連牆上掛嘅都真係阿Shaun嘅舊照。

今次阿Shaun同Ali第一次合作，相信大家一定好期待呢對視帝視后之間嘅火花，兩人更大爆拍攝蝦碌事，Shaun表示:「我地拍拍吓打麻雀甩牌戲份時，收音同事突然衝入嚟忍唔住話我手勢唔啱，倒轉咗嚟甩，早知Book定馬海倫黎做打牌指導。」相反冇咩打麻雀戲份嘅Ali，反而對甩牌相當熟識，因為佢從小被婆婆「薰陶」，摸牌打牌難唔倒佢，揚言下次可以挑戰演爛賭婆。
日前李思捷喺節目《福祿壽訓練學院》當中模仿Ali當年喺劇集《智能愛人》嘅經典機械人造型，美貌程度同本尊有好大距離，對於經典角色被「醜化」，Ali唔介意之餘，仲話阿寶呢個角色的確好多人鍾意模仿，可能戴個假髮就扮到，其實曾經演過呢個角色，算係自己半個代表作。

Rosita早前參與內地一個空中舞蹈比賽獲得亞軍，被拍檔黃庭鋒大讚佢樣樣掂，無論之前學踩滑板、呢套劇學拉大提琴等都一學即曉。Rosita大爆呢次參加舞蹈比賽，係為咗彌補之前喺台慶演出高空瑜伽未夠好嘅遺憾。至於庭鋒自爆畏高無意挑戰高空運動，Rosita透露對方技能係不停咁食嘢，仲食極唔肥。庭鋒同時大爆Rosita對演戲相當緊張，經常抽問佢上兩星期演過嘅場口，搞到佢好似成日被Miss突擊測驗咁。