洪嘉豪完成首個紅館個唱 「樂壇社工」張敬軒送音樂學院課程祝賀

洪嘉豪一連兩場演唱會終於圓滿結束，初登紅館嘅Kaho唔只有粉絲幫佢精心應援，仲收到成龍、鄭裕玲同張敬軒等致送嘅花牌。頭場嘅Kaho狀態大勇，大唱情歌兼一展舞技，Kaho完成頭場之後話自己唔會喊，只係有啲感動眼濕濕，仲話有同事開局估佢喊唔喊，點知尾場Kaho突然情緒爆發，喊足三首歌時間，喊到完全收唔到聲。

有「樂壇社工」之稱嘅軒仔，向來愛錫後輩，加上Kaho嘅媽媽就係軒仔前經理人，所以軒仔真係睇住Kaho大，而尾場軒仔做嘉賓之餘，仲送上一份大禮，軒仔話：「作為哥哥，我覺得係要供書教學，所以幫Kaho安排咗一個學位。」軒仔手執一份文件話係屬於一間著名音樂學院嘅網上證書課程，而開學日期係今年秋天，佢仲同Kaho講放心，因為課程係唔會耽誤佢幕前工作，因為課程上堂時間係香港凌晨。軒仔仲話課程係學分制，跟好多大學課程一樣，而學分仲要比其他人喺大學讀嘅為高，不過Kaho最關心係出席率點計，軒仔話梗係要出席晒，Kaho就話一定會做到。