芷珊約您｜溫拿真情剖白充滿洋蔥 阿B破產拒絕兄弟施援手

黎芷珊 主持嘅全新節目《芷珊約您》噚晚(21日)於翡翠台首播，首集打頭陣嘉賓請嚟喺樂壇屹立50年，由 譚詠麟(阿倫)、鍾鎮濤(阿B)、陳友、彭健新同葉智強組合而成嘅 溫拿樂隊 ，芷珊除咗直擊佢哋喺澳門告別巡唱綵排同上台前嘅關鍵時刻外，又緊貼到吉隆坡見證溫拿連串告別巡唱宣傳活動，有溫拿踏足嘅每個地方都被粉絲擠得水洩不通。

溫拿喺香港樂壇具有代表性，最為人津津樂道除咗推出過大量耳熟能詳嘅金曲外，五位鞏固嘅兄弟情亦令觀眾好奇。由於阿倫及阿B一直較受歡迎，二人在溫拿出道不久已獲各方邀請單飛發展，為了顧及其餘三位好兄弟，阿倫同阿B都不敢輕舉妄動，節目中有唔少佢哋嘅真情剖白。

當年歷經破產嘅阿B，非常感激兄弟打算出手相助

講到為何溫拿喺1978年時會各自發展，陳友話：「嗰兩個靚仔小鮮肉好多人搵佢哋獨立發展，咁你走咗隊band點呢？我覺得佢哋有難處嘅，咁我哋三個(陳友、健仔及智強)咪商量話不如停吓，各有各做啲嘢先啦，幾年後睇吓係咪再聚埋啦，唔通三十歲仲彈結他咩，係咪應該搵啲各自各嘅事業呢？

陳友亦直認當年因為發展步伐，溫拿一度分開發展

大家好兄弟，有啲嘢唔好等佢講，大家明吖嘛。」因此溫拿建立咗每隔五年就聚埋一齊開騷嘅傳統。芷珊更追問阿倫同阿B的嘅樂迷會否不和？阿倫即收起頑皮作風好嚴肅話：「我哋會教導佢哋，我哋係一隊band嚟，鍾意我要愛屋及烏。」阿B就話：「跟咗好多年嘅fans，冇分鍾意邊個，係鍾意我哋隊Band。」

成陣半世紀嘅溫拿，喺節目分享多年來嘅相處同小故事

人生總有高低起跌，阿B喺2002年面對經濟難關，被法庭頒布破產令，兄弟們想齊心施援手，阿倫甚至曾親自同阿B溝通了解欠債數字，並坦言：「我哋成班有諗過不如我哋開演唱會同佢搞掂啦，但阿B就話唔使。」雖然事過境遷，但經歷事件證明阿B係位有擔當嘅真漢子，佢話：「發生咗事情就面對，佢哋係好有心想幫我呢件事，但我自己嘅事應該自己承擔，就算係幫我，都冇理由佢哋咁辛苦嚟幫我。」五子情比金堅嘅友誼，一切盡在不言中。

歌迷遍佈各地，告別演出亦到唔同地方同大家講拜拜

《芷珊約您》逢星期日晚 21:30 翡翠台