福祿壽訓練學院｜真假李龍基合體場面爆笑 基哥讚祖藍模仿自己神似

王祖藍、阮兆祥、李思捷主持嘅TVB綜藝節目《福祿壽訓練學院》，未來兩個星期會展開團戰，表現不佳嘅戰隊將會有學員被淘汰，節目組為咗隆重其事，更請到香港演藝學院前副教授羅冠蘭老師擔任評審。

演技了得嘅羅冠蘭誇口稱扮嘢喺佢心目中並唔難，但絕對係好重要，亦係作為好演員嘅要素之一，因為好多角色嘅原本都係要靠觀察別人再揣摩而連成角色，大部份屬模仿能力，所以扮嘢係節目最重要一部份。

首集王祖藍扮演話題人物李龍基引嚟好大迴響，呢集節目邀請到本尊作客，真假李龍基同場獻唱，神韻相映成趣，場面爆笑。基哥毫不介意被人模仿作笑料：「有機會畀人扮你係榮幸，都開心。」至於邊個扮得佢最神似？基哥就話只睇過祖藍嘅演出，但覺得思捷都不容忽視。呢段時間基哥受到未婚妻Chris王青霞官司纏身影響，心情難免處於低谷，情況令人擔心，不過基哥就叫大家放心，佢嘅現時身心都慢慢好起嚟，5月及7月先後會赴澳洲同美加工作，陸續恢復正常生活。