150萬就可以做業主，單位除咗室內空間，仲有個天台添！夠唔夠吸引呢？今次主角再出現敘利亞風嘅舊樓物業，位於西營盤皇后大道西235/237號嘅舊樓，於1972年落成，至今都有54年樓齡嘅銀主盤。
銀主盤｜西營盤皇后大道西舊樓
今次嘅銀主盤來自忠誠集團嘅拍賣項目，單位位於西營盤皇后大道西235-237號一棟舊樓。從網上資料顯示，整棟樓宇於1972年落成，距離至今足足54年歷史。而拍賣單位位於頂層嘅5樓B室，實用面積257平方呎一房，樓契仲包括一個229平方呎嘅天台。
從拍賣行提供嘅相片見到，單位唔單只空間細，裝修嘅狀態陳舊破爛，似敘利亞打仗後嘅景象。另外，相信天台有潛在嘅漏水問題，導致單位嘅客廳及房間嘅天花破爛到要用膠袋遮蓋，以免被剝落嘅石屎擊中。而客廳嘅牆身都有嚴重嘅破爛，相信新買家需要大筆資金進行修葺，單位先可以再次住人。
講講今次銀主盤嘅優點，相信係佢嘅交通網絡。由西營盤站A1出口行到樓下，不需30秒就行到。另外，附近周邊由於發展多年、配套相當成熟，所以飲食及民生小店有齊。所以對於有興趣競投嘅買家嚟講，唯有一諗嘅係買嚟自住定投資搏收樓重建，前者需要預留非常大筆資金用作修葺，後者的就要睇睇150萬呢口起始價會否太貴喇，因為計一計，呎價都要HK$5,836呎。
西營盤皇后大道西235/237號5字樓B單位連天台
📍 物業地點：皇后大道西235/237號
🏘️ 物業面積：257平方呎＋229平方呎天台
📏 平均呎價：$5,836.6港元
💰 拍賣開價：150萬港元
📅 拍賣日期：4月15日（星期三）下午3時
✍🏻 物業編號：26041505
🔑 拍賣地點：中環德輔道中84-86號章記大廈３樓Ａ室
延伸閱讀
香港樓市｜唔使3球！屯門黃金海岸476呎銀主盤 低銀行估價近3成 值唔值上車？