乘坐巴士有規則要遵守，但日前一名女子公然挑戰規則，更影響交通安全！有網民在社交平台貼出影片，可見一名女子在荃灣不守交通規則，自己衝出馬路拍門追巴士，要求巴士車長開門。
女子荃灣衝馬路拍門追巴士勁牙煙
有網民在社交平台發帖文，寫道「個司機勁慘」，又貼出影片。影片拍攝於荃灣近城門谷運動場附近，一名女子疑因未能在巴士站上到巴士，故衝出馬路拍門追巴士。
影片所見，一旁有多輛汽車正在行駛，不乏的士及私家車，更有巴士等，無故走出馬路是相當危險。而女子在該輛「A31」龍運巴士門外不停拍門，當時巴士亦正在行駛，但車長疑因擔心女子安全故最後開車放行。
影片截圖：
司機終開門放行被網民鬧爆
不少網民斥責女子的危險行為，亦有人認為司機不應做壞規矩，「司機好慘，我諗佢開門只係怕出人命」、「個司機一定會比人炒啦」、「我又明司機兩難喎，郁車佢都照拍門，其實有危險」、「其實應該揸正做唔開門，條友肯定之前試過。」、「有得一次，就有第14億次」、「點都唔可以俾佢上，尤其現在資訊發達年代」、「呢條片，可能令個司機無左季度安全獎金幾千蚊。」、「可能會有司機無左份工」、「開咗門比佢上，唔知個客係講唔該定係鬧巴士佬係咪盲」、「拿拿聲俾佢上車開車，唔洗塞住條路」、「開咗門就違規，唔開門見到有人貼住架車開車又係衰，司機真係好慘」、「老實講，司機唔比佢上，佢又死都唔行開，除左報警都冇咩選擇」、「司機點樣做都會千夫所指，眼見啲車已經開動緊，個女乘客都會有相當危險。」、「你對人仁慈，即係對自己殘忍。客都有做客嘅責任」、「開門就錯曬，公司有把柄」、「其實公司training唔係有教呢啲時候應該點做嘅咩？」、「司機坐係度袋住人工同佢玩，最慘係車上面嘅乘客，都唔知有冇客要趕飛機」、「阿車長，佢唔要條命就由得佢啦！你分分鐘冇咗份工㗎！」、「應該停車報警」、「俾咗佢上車，開咗先例就收唔到科」、「咁樣違反安全指引，呢啲客真係累人累物」、「條女痴線 追到路中心逼人開門」。
女子衝馬路追巴士或已犯法
根據香港法例，第374章《道路交通條例》所指，條例中對行人及車輛有明確的交通規則，衝出馬路追巴士，可能違反「不小心或疏忽地使用道路」的條文。
而據第230A章《公共巴士服務規例》第13A條規定，乘客不得故意阻礙或妨礙巴士司機，或引致他人受傷、不安、煩擾或不便；至於第25條規定，任何乘客不得無合理辯解而違反第13A條，一經定罪，可處罰款2,000港元。