本港經濟不景氣下，除飲食業外，零售業亦首當其衝受災，掀起結業潮，加上內地網購平台攻港玩包郵加價格戰，令本地特賣場通通「做唔住」。知名特賣場「執笠倉」、「文具佬」均有分店相繼約滿結業。
結業潮｜執笠倉北角分店即將結業
本地特賣場「執笠倉」宣布，其位於北角英皇道的分店即將結業。店方於社交平台表示，「執笠倉北角分店約滿結業，我哋要止蝕離場。最後營業時間，暫定於8月23號」。
結業潮｜文具佬中環分店約滿結業
另一本地特賣場「文具佬」同樣有分店約滿結業。店方於社交平台表示，其中環分店再次租約期滿，又稱，「中環係香港心臟地帶，地標位置、租金貴到離譜。業主一向心雄，唔係加租就係唔續約，今次已經係我哋第二次喺中環有分店結業」。
文具佬官方又指，「兩年前，上一次中環分店因為業主加租結束之後，業主搵唔到新租客，直接租咗俾散貨場，場景都幾唏噓。今次間鋪業主直頭不考慮續租俾我哋。香港依家市道麻麻，人流唔見晒，消費亦謹慎咗，就算喺中環咁核心嘅位置，面對沉重嘅租金壓力，要生存確實係好唔容易」。
文具佬補充，「審視過而家嘅情況，我哋中環區暫時唔會考慮搵返一間舖開分店，每次兩年合約一完，就要執一次，洗一次裝修錢，條數計唔掂」。
結業潮｜街坊婉惜：又少一間
事件引起不少街坊留言，有人婉惜零售店又少一間，亦有人認為加租對小商舖而言太不人道，「真係好唔捨得！」、「我系中意夠多新款，又唔算太貴，希望你地快d開番分店！」、「好過焗住縱容班吸血鬼先，有心嘅咪去金鐘同上環」、「有點捨不得但又可以點⋯現實就是這樣。」、「期待希望在另一區再開」、「高租金從來都係窒礙香港經營多樣發展的主因」、「現在經濟環境，業主直情唔考慮同租客續租，究竟係咩原因呢？」、「又少一間好可惜」、「唔使租呢度捱貴租，唔化算啦」、「附近再租番間啦！食完飯去行一圈買下野已經係每日既樂趣黎....冇左真係好大鑊...」。