西貢一間村屋內驚現巨型大蟒蛇！一名網友在社交平台發帖文，指驚見家門外有大蛇盤踞，慌忙之中亦拍片分享。片主表示搬新屋數日已巧遇中蛇，「今次咁近見到真係好好彩」。
西貢村屋外驚見蛇蹤
據片主在社交平台的帖文說，「啱啱搬去去新屋唔夠幾日，已經巧遇巨蟒。最近由於搬左去西貢深山，真係深山嘅深深處，屋出面得田，完全冇街燈，夜晚出入只能靠電話微弱嘅燈光，照住唔好差錯腳。」
片主指，「尋晚出村口接婆，出去都冇嘢，番黎時路上面赫見巨型大蟒，條蟒蛇總長超過3米，真係非常大條」。影片所見，巨型大蟒長度不凡，身上亦見鮮艷花紋，而大蛇看似未有襲擊人類的行為。
片主又形容自己好運，因能見到大蛇，「同番原居民業主講，佢住係度幾十年，都只係細個見過一次，今次咁近見到真係好好彩」。
網民：西貢真係好多「小動物」
影片被上載至網上後，吸引不少人留言，指西貢經常有「小動物」出沒，亦有其他人分享見到蛇的經歷，「大條其實先好，起碼老遠見到同埋多數無毒」、「蟒蛇係香港受法律保護動物，係香港原生動物，土生土長原居民」、「我呢邊無蛇，但半夜放狗會見到螢火蟲」、「以前細個返鄉下見到有條蛇，我表哥話佢有劇毒，唔好搞佢，同埋條蛇會行得好快，我唔信，掉左粒碎石落條蛇到，條蛇飛奔衝過黎，嚇到我，真係飛速咁快」、「唔好打死條蛇呀佢仲驚過你」、「只要冇受驚，蛇唔會主動攻擊」、「香港緬甸蟒黎，無毒既」、「俾佢行先就行~佢地其實好驚人」、「有蛇幫你食晒d老鼠，正呀！」、「我媽住西貢附近...有好多樹又濕...樓下看更都話有蛇....總知夏天係要小心D」、「如果真係三米，佢都應該仲係大BB嚟，同埋佢係屬於二級受保護動物，所以冇乜嘢都唔好搞佢」、「想問依條蛇有無人知佢活咗幾耐先至咁長？」。