港島的鶴咀為行山勝地，不止港人愛去，就連旅客都喜愛！近日有港人在網上發文，指在鶴咀看到有內地旅行團隨地吐瓜籽兼吐痰，其後看不過眼要求帶走垃圾，反被內地客話「歧視」。
港島鶴咀內地客隨地吐瓜籽兼吐痰
有港人在網上發文，寫道去鶴咀行山被內地人指歧視，其後看不過眼要求帶走垃圾，「首先我見到佢哋一路喺度執石、吐瓜籽、吐痰，將垃圾留喺現場。後尾實在忍唔住，行上前全程用普通話講 麻煩將自己啲垃圾拎返走，睇落佢哋似有領隊 我就直接同領隊講，佢哋一開始唔認，話都有用垃圾袋裝好啲垃圾，呢刻心諗好彩有錄低，我將佢哋執石頭吐瓜籽等嘅過程拎畀佢哋睇。」
其後，相關領隊更疑似聽到廣東話便生氣，「佢哋班人一聽到廣東話就嬲嬲豬，話我哋歧視佢哋，我哋全程冇一句粗口，甚至連一個字粗口都冇，仲話我哋人生攻擊；後尾我哋話我哋住呢度，所以要保護呢度嘅環境，佢哋知我哋住香港之後就話『不要覺得自己是香港人就高人一等』，仲要係咁用好大陸的難听粗口鬧我地。」
據帖主上載的影片所見，一名手持旗幟的疑似導遊，疑向香港人說粗口；有影片則見有人亂倒水於石頭上及隨地吐瓜籽；亦見到有人有人亂執石頭。
網民：多謝港人守護香港
不少人對這些沒質素的旅客表示震驚，又指執法部門應該多加巡查，亦有人指多謝港人守護香港，「多謝你守護香港」、「建議視頻發到抖音＆小紅書平台，唔知入境事務處是否可以投訴」、「睇到火滾。點解香港人喺自己地方都要俾外人恰？」、「佢地好鐘意自己做錯就推卸落人地到」、「領隊係大陸人？ 黎香港有冇伸報架，係唔係黑工？」、「其實報警係好啲嘅」、「對住呢d垃圾都忍到唔講粗口真係好有修養。」、「你下次話你係守護中國大好河山既環境關愛隊+人民警察」、「佢話報警咪直接報警」、「多謝你，好勇敢」、「你做得啱㗎」、「多謝你挺身而出」、「不是別人歧視中國人，是他們的行為沒有公德心，破壞自己中國人的形象」、「你放小紅書首先唔好出樣」、「點解好似係香港人比佢哋歧視咁」、「我們歡迎他們來行山，但真的要有紀律不要污染別人環境，這樣真的很討厭」。
任何人違反條例即屬犯罪
根據香港法例第208A章《郊野公園及特別地區規例》，任何人不得在郊野公園或特別地區內故意或疏忽地污損、損壞、弄污或弄髒任何由總監建立、使用或保養的告示、標記、圍欄、建築物、遮蔽處、設備或裝置。
若任何人違反條例，即屬犯罪，可處罰款2,000元及監禁3個月，如該罪行屬持續的罪行，則可就該罪行的持續期間，另處每日罰款100元。