「粵車南下」計劃推出後，不少內地車主開車來港遊玩，但同時亦因不熟悉香港交通規例，引發連串亂泊車、切線甚至逆向行駛風波。今日網上再有影片熱傳，一名疑似內地司機把七人車直接停在馬路中心位置，被警員即場發現，隨即向司機開出「牛肉乾」（罰款通知書）。
來港亂泊車停馬路被警員「抄牌」
據影片顯示，一輛掛中港車牌的七人車停在行車線旁，位置明顯不是泊車區或臨時上落客區。警員走近車旁，向司機查問，並着車主取出證件，其後在其車窗位置寫票「派牛肉乾」。
事件引起途人及駕駛者側目。影片中，一名身穿白色衣服的疑似車主似乎有所反應，但因紅燈未能行前，只能靜候警員完成程序。而片主在帖文則語帶戲謔地寫道：「原來真係會抄牌。多謝貢獻香港$400。」
網民：多謝貢獻香港
影片一出，網民議論紛紛，其中不少人擔心內地車主會否乾脆「唔交錢」，憂慮執法後續追討困難，亦有人呼籲政府應加強跨境執法機制，避免違例泊車變無下文，「抄完走返內地咪得，點會交罰款。」、「拖走埋就更完美啦！阿Sir加油！」、「會唔會走數？」、「咪最多唔再入香港境，醫院都唔追數啦。」、「$400之嘛，又唔係$5000。」、「抄牌還抄牌，繳款還繳款。」、「係唔扣安全帶都要罰5千，咁樣抄個牌只需4百，真係抵到爛。」、「多年前係話抄左都告唔到，因為無車主地址，而家唔知。」、「換個車牌咪又可以走數。」、「有冇交罰款都冇人知。」。