逆天奇案2丨開播首周成績彪炳 劉家豪率領台前幕後慶祝

《逆天奇案2》開播以嚟喜訊浪接浪，首集喺4月1號播出，錄得7天跨平台總收視22.8點，成為黃金時段收視冠軍，仲係首周跨平台直播收視黃金時段冠軍。劇集喺內地同樣熱爆，短短一個禮拜就播放超過一千萬，同時打入內地全網放量同全網熱度Top 10，以及榮登一個影視平台「男人愛看電視劇第一位」，獲得咁超班嘅成績，對台前幕後都係好大嘅鼓舞。

總監製劉家豪率領 陳展鵬 林夏薇 方力申 馮盈盈 高鈞賢 黃智賢 蔣祖曼 等以及一眾台前幕後工作人員食飯兼睇劇，現場仲有大抽獎環節與眾同樂，對於喜訊連連，演員們當然興奮，展鵬同 張頴康 話劇中有薇薇、麥玲玲當然好收視，薇薇就指劇情越嚟越有追看性，佢又留意到觀眾同網民集氣諗啲方案，想令阿Wing同森Sir復合，身旁嘅展鵬就話而家先第6、7集，等薇薇同小方發展先，佢對自己森Sir角色有信心。

飾演天才生物學教授嘅小方，同大奸角張頴康喺劇中交流掀起觀眾揣測關係，仲獲內地網民封為最新CP，阿康話開以開搶BL劇種，小方就預告話其實嚟梗之後集數已經有，暫時未有身體接觸，先玩住手指。講到劇中生物學理論嘅對白，小方話自己再睇番都唔明自己講乜，薇薇話當時喺現場都驚自己接唔住對白，累到小方要再講。

盈盈同高鈞賢呢對CP堪稱係最閃嘅一對，喺劇中Matthew對受過傷害嘅盈盈照顧有加，盈盈都大讚Matthew係劇中最暖嘅暖男，佢仲話有一幕甜蜜對手戲，拍出嚟嘅感覺更令在場嘅女導演尖叫咗出嚟，因為有種以前青春戀愛偶像劇嘅心跳感覺。

飾演Nic Sir嘅黃智賢雖然求婚食檸檬，但佢同蔣祖曼呢對戀人令觀眾隔住個電視都心甜，佢哋都話對收視好有期待，Joman仲話想攞埋「女人愛看電視劇第一位」，阿Ben就話嚟梗劇情會有較多感情線同鬥智鬥力嘅劇情，應該會吸引更多女性觀眾。