逆天奇案2｜女神郭柏姸甩純潔形象做情婦 鄭俊弘挑戰演植物人感難度

陳展鵬、林夏薇、馮盈盈、黃智賢、蔣祖曼、張頴康、劉佩玥、方力申及高鈞賢等主演及由劉家豪總監製嘅TVB劇集《逆天奇案2》，每集有迂迴曲折嘅查案情節。

方力申透過「腦波儀」同 Fred 溝通，還原 30 年前案件真相！Fred 受盡強勢老婆王菲冷言冷語，女尊男卑嘅生活令佢好壓抑。

噚晚呢集終於破解咗「廢屋枯骨案」，首先O記探員喺荒廢村屋發現一副30年嘅女性骸骨及染了精液嘅小背心，經過調查後發現死者係王珊珊（郭柏妍Rosita飾），事件牽涉當年因交通意外變成植物人嘅豪門四少馬家強（鄭俊弘Fred飾），經過DNA檢測後，證實王珊珊小背心上嘅精液係家強留下。

Fred 同 Rosita 邂逅，搵番生活中嘅一點甜。

Rosita 知道咗 Fred 有老婆之後好崩潰。

Rosita 原本諗住同 Fred 一齊殉情，最後一次甜蜜過後，Rosita 諗住殺死 Fred。

O記更請來天才生物學教授冠峰（方力申飾）利用「腦波儀」令家強道出30年前真相。原來珊珊當年對家強愛得不能自拔，並相約在村屋殉情，不過家強因貪生怕死，令珊珊持刀自插心口自殺，要家強永遠銘記一世。之後家強跑出屋外求助卻意外被汽車撞到變成植物人，案件最終驚揭係一宗橫跨30年嘅愛情悲劇，令人意想不到。

Rosita 諗住殺死 Fred，之後再自殺。

Rosita出演小情婦角色搶眼，成功搣甩純純兔形象，手持生果刀威脅Fred殉情嘅樣子夠晒嚇人，同平日斯斯文文嘅佢判若兩人。Rosita認為角色極大挑戰性：「第一次演呢類角色，雖然集數唔多，但覺得好好玩，多謝導演同製作組畀咗好多空間我去做得更好。」講到劇中殉情戲，Rosita坦言心情難受：「呢場戲內心好壓抑，拍完之後都覺得好唔開心，希望觀眾能夠感受到我嗰種無力感。」

佢見到 Fred 怕死樣之後，決定自殺等佢永遠記住自己。

Fred首度扮演植物人，事前刻意上網做Research研究角色：「我個Case係對眼郁唔到又眨唔到、又表達唔到自己嘅情緒，劇情講小方訪問我時，我有好多哀愁情緒表達唔到出嚟，呢點係最難。」Fred又笑言拍攝過程其實幾舒服，全日都瞓喺度，不過劇中嘅老妝就要花兩個鐘先完成。
Fred 原本走出屋搵人求救，點知最後畀貨車撞到變植物人。