Mayanne小喇叭丨湯盈盈周家怡大爆瘋狂醉酒史 麥美恩自爆大膽嘔落獎門人隻手

由麥美恩同曾展望主持嘅清談節目《Mayanne小喇叭》今晚（12日）呢集邀請周家怡及湯盈盈擔任嘉賓一齊大談女人經，家怡同盈盈更曾經為角色犧牲過靚樣。
盈盈話阿好個造型太肉酸，仲話曾經後悔過。

盈盈喺《阿旺新傳》飾演李笑好：「呢個角色好深刻，記得嗰陣時監製黃偉聲同我講要做呢個角色，我有好多Idea，我話唔洗頭、堂眉唔抆、到時再畀個假牙我。真係試造型時，嘩，真係好醜樣，好後悔。」而家怡喺《火舞黃沙》飾演兔唇女小琴，佢自爆戴牙套扮兔唇搞到牙都崩埋，透露為咗代入角色長期戴住牙套：「我連出街都戴住，我試過去便利店買嘢畀人影到！」

家怡戴牙套扮兔唇，仲因此搞到崩牙。

Mayanne、家怡同盈盈同樣係玩得之人，Mayanne大爆曾目擊盈盈醉後四圍咀人，盈盈仲自爆： 「嗰次之後中咗甲型流感，好似祥仔（阮兆祥）個女朋友畀我搞掂咗，我唔敢講番畀佢知！」Mayanne自爆有次同獎門人曾志偉去澳門做倒數騷，喺事後派對醉到不省人事，唔夠半個鐘已開始嘔，嘔咗喺獎門人手上；同樣玩得嘅家怡就自爆有次跟獎門人去馬來西亞拍節目，行程最一日盡情狂歡，佢仲一邊嘔一邊同獎門人猜枚：「結果係斷晒片，喺飛機上先醒番，醒番已經開始降落香港！」
三女大談醉酒史，盈盈醉後會四圍咀人，仲試過搞到中流感。Mayanne 就勁大膽嘔落獎門人手上。

講到感情方面，37歲嘅Mayanne透露被阿媽瘋狂催婚，身為單身貴族嘅家怡以過來人身份話： 「你會經過㗎喇，因為佢哋會擔心你老咗冇人照顧你。」家怡更向Mayanne傳授秘笈，如何應對長輩催婚！盈盈就大爆當年未婚懷孕時，錢嘉樂曾打電話向獎門人「求助」 ，盈盈指獎門人當時反應非常搞笑，並以7個字作回應！講到生兒育女問題，事業正值上升期嘅 Mayanne坦言現在未知係咪最好Timing，盈盈提議佢雪卵，Mayanne就話除咗身體上要配合，亦要具備一定財力，事關雪一次卵要差唔多8至10萬不等，佢搞笑話：「事業上要好成功，先有能力去養呢啲卵子！」

家怡教 Mayanne 一招應對長輩催婚。Mayanne話雪卵要體力同財力兼備。盈盈當年未婚懷孕，獎門人究竟講咗啲咩呢？

《Mayanne 小喇叭》逢周四、五晚 10 點半翡翠台