近日有網民在社交平台上載照片，顯示行人過路燈旁新增一個「延長閃綠燈」裝置，並貼有指示「請拍卡」。帖文直言：「依家延長閃綠燈都要拍卡俾錢？！」引起網民熱烈討論。
從照片可見，裝置設於行人過路燈按鈕下方，黑色面板印有「延長閃綠燈 Extend Flashing Green」字樣，並附圖示，指示市民以卡拍讀器延長綠燈時間。
不過裝置本身其實並未有標示指拍八達通卡要「收費」，相信裝置實為免費使用，拍卡設定只為限制使用者身份，如長者或傷殘人士所用之指定八達通才能使用延長閃綠燈服務。
網民熱議：有冇 yuu 可以儲埋分？
帖文引來大量留言，有人搞笑問：「有冇yuu，可以儲埋分？」亦有人猜測：「係咪2蚊卡專用，15秒延長，其他卡無效？」另有網民認為設計或為照顧長者及行動不便人士：「傷殘，或者老人行得慢啲咪需要拍一拍延長交通燈囉。」
不少網民質疑實際操作：「拎完張卡出黎，應該已經過左馬路，邊條 X 樣玩鳩啲阿公阿婆？」亦有人建議改用輕觸式，但隨即有人反駁：「輕觸式會被濫用。」
人性化還是多此一舉？
部分留言認為，設計概念「幾有人性化」，讓長者拍卡延長綠燈，減少過馬路壓力。不過，網民普遍希望官方澄清及加強普及教育，避免市民誤解或引起爭議。